Omkar Tarmale SRH IPL 2026 : शेरेगावचा शेर, मराठमोळ्या ओंकारचं नॉर्मल स्पीड 140, बचत गटातून कर्ज घेऊन ट्रेनिंग, आता IPL गाजवणार!

Who is Onkar Tarmale SRH IPL News : आयपीएल 2026 च्या ऑक्शनमध्ये अनेक बड्या खेळाडूंवर कोट्यवधींच्या बोली लागल्या.

Who is Onkar Tarmale SRH IPL 2025

आयपीएल 2026 च्या ऑक्शनमध्ये अनेक बड्या खेळाडूंवर कोट्यवधींच्या बोली लागल्या.

पण या झगमगाटात महाराष्ट्राच्या ग्रामीण भागातून आलेल्या एका तरुणाने सगळ्यांचं लक्ष वेधून घेतलं.

शहापूर तालुक्यातील शेरेगावचा 21 वर्षांचा वेगवान गोलंदाज ओंकार तारमळे याची सनरायझर्स हैदराबाद (SRH) संघाने निवड केली आहे.

सनरायझर्स हैदराबादने ओंकारला 30 लाख रुपयांच्या बेस प्राइसवर आपल्या संघात सामील करून घेतलं.

मराठमोळ्या ओंकारचा नॉर्मल बॉलिंग स्पीड तब्बल 140 किमी प्रतितास आहे. त्याच्या वेगाने आणि आत्मविश्वासाने स्काऊट्सही प्रभावित झाले.

Continues below advertisement

ओंकारचा प्रवास मात्र अजिबात सोपा नव्हता. घरची परिस्थिती अत्यंत हलाखीची. वडील तुकाराम तारमळे शेतकरी असून शेतीवरच कुटुंबाचा उदरनिर्वाह चालतो.

मोठ्या शहरांमध्ये ट्रेनिंग घेण्यासाठी आणि दिल्ली, त्रिपुरा येथे सामने खेळण्यासाठी लागणारा खर्च परवडणारा नव्हता. तरीही मुलाचं स्वप्न जिवंत ठेवण्यासाठी कुटुंबाने हार मानली नाही.

ओंकारचे वडील तुकाराम तारमळे म्हणाले, “आमची आर्थिक परिस्थिती अशी नव्हती की, मी माझ्या मुलाच्या स्वप्नांना पंख देऊ शकेन. त्याला बाहेर खेळायला पाठवण्यासाठी आमच्याकडे पैसे नव्हते. शेवटी बचत गटातून 3 लाख रुपयांचं कर्ज घेतलं. आज त्याची मेहनत रंगाला आली आणि देवाने त्याला त्याचं फळ दिलं.”

बचत गटाच्या कर्जातून सुरू झालेला हा संघर्ष आज आयपीएलपर्यंत पोहोचला आहे.

शेरेगावचा हा शेर आता देशातील सर्वोत्तम खेळाडूंविरुद्ध मैदान गाजवण्यासाठी सज्ज झाला आहे.

आयपीएल 2026 च्या हंगामात ओंकार तारमळे आपल्या वेगवान गोलंदाजीने सनरायझर्स हैदराबादसाठी काय कमाल करतो, याकडे संपूर्ण महाराष्ट्राचं लक्ष लागून राहिलं आहे.