US Attacks On Iran: अमेरिकेने इराणविरुद्ध जगातील सर्वात घातक अस्त्रं वापरलं; डोंगराला भेदणाऱ्या बॉम्बने इराणचे आण्विक तळ केले उद्ध्वस्त

US Attacks On Iran: इराण आणि इस्रायल यांच्यातील संघर्षामुळे मध्यपूर्वेत युद्धाचे ढग दाटले असतानाच अमेरिकेने या युद्धात उडी घेतली होती. या हल्ल्यानंतर अमेरिका आणि इराणमधील तणाव शिगेला पोहोचला आहे.

US Attacks On Iran

US Attacks On Iran: इराण आणि इस्रायल यांच्यातील संघर्षामुळे मध्यपूर्वेत युद्धाचे ढग दाटले असतानाच अमेरिकेने या युद्धात उडी घेतली होती.

21 जून रोजी अमेरिकेच्या अत्याधुनिक बी 2 स्टील्थ बॉम्बर्स विमानांनी इराणमधील तीन आण्विक तळांवर हल्ला केला होता. याठिकाणी अमेरिकेने शक्तिशाली बॉम्ब टाकून इराणने जमिनीच्या खाली उभारलेल्या लष्करी सुविधा आणि आण्विक तळ उद्ध्वस्त केला होता.

अमेरिका आणि इराणमधील तणावादरम्यान ज्या शस्त्राची सर्वात जास्त चर्चा होत आहे ते म्हणजे GBU-57, ज्याला 'मॅसिव्ह ऑर्डनन्स पेनेट्रेटर' म्हणतात. हा अमेरिकेतील सर्वात घातक बॉम्बपैकी एक आहे जो विशेषतः खोलवर बसलेले तळ नष्ट करण्यासाठी डिझाइन केलेला आहे. तो मिसूरीच्या व्हाईटमन एअरबेसवरून उडणाऱ्या B-2 स्टेल्थ बॉम्बर्समधून सोडला जातो.

GBU-57 विशेषतः भूमिगत बंकर आणि बोगदे नष्ट करण्यासाठी डिझाइन केलेला आहे. त्याचे वजन सुमारे 13,600 किलोग्रॅम आहे आणि तो जमिनीपासून 61 मीटर खाली घुसून स्फोट घडवून आणण्यास सक्षम आहे. त्याचा पृष्ठभाग इतका मजबूत आहे की तो वेगाने जमिनीत शिरला तरी तो तुटत नाही.

GBU-57 बॉम्ब टाकण्याची प्रक्रिया अतिशय अचूक आहे. उपग्रह नेव्हिगेशनद्वारे लक्ष्य निश्चित केले जाते आणि बॉम्ब उंचीवरून खोलीवर टाकला जातो. बॉम्बमध्ये असलेल्या विलंब फ्यूज यंत्रणेमुळे स्फोट निश्चित खोलीवर होतो याची खात्री होते. अनेकदा हल्ल्यात एकापेक्षा जास्त बॉम्ब टाकले जातात, पहिला मार्ग मोकळा करण्यासाठी आणि उर्वरित संपूर्ण विनाशासाठी.

Continues below advertisement

रॉयटर्सच्या मते, अमेरिकेने इराणवर केलेल्या हल्ल्यात बी-2 स्टेल्थ बॉम्ब वापरण्यात आल्याची पुष्टी अमेरिकन अधिकाऱ्यांनी केली आहे.

अमेरिकेने केलेल्या हल्ल्यांचं प्रत्युत्तर म्हणून इराण होर्मुझची सामुद्रधुनी बंद करण्याचा निर्णय घेण्याच्या तयारीत आहे. यामुळे जगभरातील तेलाच्या किमती गगनाला भिडू शकतात. होर्मुझची सामुद्रधुनी बंद करण्याचा प्रस्ताव इराणच्या संसदेत मंजूर झाला आहे. आता याबाबतचा अंतिम निर्णय इराणी सर्वोच्च नेते खामेनेई घेणार आहेत. जगातील 20 टक्के तेलाचा व्यापार होर्मुझच्या सामुद्रधुनीतून चालतो. या मार्गाने बहुतेक तेल आशियाई देशांमध्ये जाते. तसेच या मार्गाने तेलासह वायूचीही वाहतूक केली जाते. आशियाई देशांसाठी हा महत्वाचा निर्यात मार्ग आहे. मात्र, हा मार्ग बंद झाल्यास भारत, चीन आणि पाकिस्तानला मोठा फटका बसू शकतो. त्यामुळे इराणच्या या निर्णयाविरुद्ध अमेरिका कठोर कारवाई करण्याची शक्यता आहे.