Navaratri 2023 : नवरात्रीची चौथी माळ; रुक्‍मिणी माता सजली सरस्वती मातेच्या रूपात

आज शारदीय नवरात्रीचा चौथ्या माळेला श्री विठ्ठल रुक्मिणी मंदिरात रुक्मिणी मातेची पूजा सरस्वती रूपात बांधण्यात आली.

कमरेवर हात ठेऊन उभा असणाऱ्या रुक्मिणी मातेला सरस्वती मातेच्या बैठ्या रूपात सजवताना अतिशय कल्पकतेचा वापर करून ही पूजा बांधण्यात आली.

सरस्वती मातेच्या रूपात सजवताना रुक्मिणी मातेला सोन्याचा मुकुट, नवरत्नांचा हार, जडावाचे बाजूबंद जोड, खड्याची वेणी, तन्मणी, दशावतारी हार, मोर जोड, ठुशी, शिंदे सरकार हार घातला आहे.

त्याशिवाय, सोन्या मोत्याची तानवड जोड, चंद्र, मोत्यांचा कंठा, बाजीराव गरसोळी, मण्या मोत्याच्या पाटल्या जोड, मोत्यांचे मंगळसूत्र, रूळ जोड, तारा मंडळ ही आभूषणेही परिधान करण्यात आली आहेत.

कर्णफुले जोड, मोठी नथ, सोन्याची ठुशी, बाजूबंद, शिंदेशाही ठुशी, हिरवी पाचूची चिंचपेटी अशा तब्बल 21 पारंपरिक रत्नजडीत दागिने परिधान करण्यात आले आहेत.

रुक्मिणी मातेला मोरपंखी रंगाची भरजरी पैठणी नेसविण्यात आली असून तिला बैठे रूपात दाखवण्यात आले आहे.

रुक्मिणी मातेच्या मागे मोरपिसे ठेवण्यात आले आहेत .

आज विठुरायाला देखील सोन्याचा मुकुट, कौस्तुभ मणी, हिरेजडित दंडपेट्या, शिरपेच, मोत्याची कंठी, मोत्याचा तुरा, सोन्याचा तुळशी हार परिधान करण्यात आला.

त्याशिवाय, हिरेजडित चंद्रहार, सूर्यकाळांचा हार, हिऱ्याचे कंगन जोड, मत्स्य जोड, सोन्याचे तोडे अशा 12 प्रकारच्या विविध हिरेजडित अलंकाराने सजवण्यात आले आहे.

नवरात्री निमित्त हिरेजडित विठ्ठल रुक्मिणीची लोभस रूपे पाहण्यासाठी मंदिरात भाविकांनी मोठी गर्दी केली आहे.