Manoj Jarange Patil Maratha Mumbai Morcha: पाणी टँकर ते 800 स्वच्छता कर्मचारी ते स्वच्छतागृह; मनोज जरांगेंच्या इशाऱ्यानंतर आझाद मैदान परिसरात व्यवस्था

Manoj Jarange Patil Maratha Mumbai Morcha: आझाद मैदान आणि परिसरात,नियमित आणि फिरते असे मिळून सुमारे 300 पेक्षा अधिक शौचकूप असणारी प्रसाधनगृहांची व्यवस्था आंदोलकांसाठी विनामूल्य उपलब्ध आहे.

Manoj Jarange Patil Maratha Mumbai Morcha

आझाद मैदानावरील आंदोलनासाठी आलेल्या आंदोलकांसाठी पिण्याच्या पाण्याची व्यवस्था म्हणून बृहन्मुंबई महानगरपालिकेने एकूण 25 टँकर उपलब्ध करून दिले आहेत.

आझाद मैदान, महापालिका मार्ग, छत्रपती शिवाजी महाराज रेल्वे स्थानक, हुतात्मा स्मारक चौक, बॉम्बे जिमखाना, हज हाऊस, मरीन ड्राईव्ह पोलीस स्टेशन, एअर इंडिया इमारत, त्याचप्रमाणे येलो गेट, फ्री वे वर शिवडी, कॉटन ग्रीन वाहन तळ, वाशी जकात नका या ठिकाणी सदर टँकर पाणीपुरवठा करीत आहेत.

आझाद मैदान आणि संपूर्ण परिसरात मिळून महानगरपालिकेने सुमारे 800 स्वच्छता कर्मचारी नेमले आहेत.या कर्मचाऱ्यांकडून अखंडपणे स्वच्छता राखली जात आहे.

आंदोलकांना देखील महानगरपालिकेच्या वतीने कचरा संकलनासाठी थैल्या (डस्टबिन बॅग) मोठ्या संख्येने वितरित करण्यात येत आहेत.

या थैल्यांमध्ये आंदोलकांनी कचरा टाकून तो महानगरपालिकेच्या कर्मचाऱ्यांकडे सोपवावा, यासाठी सातत्याने आवाहन करण्यात येत आहे.

आझाद मैदान आणि परिसरात,नियमित आणि फिरते असे मिळून सुमारे 300 पेक्षा अधिक शौचकूप असणारी प्रसाधनगृहांची व्यवस्था आंदोलकांसाठी विनामूल्य उपलब्ध आहे.

प्रसाधनगृहांमध्ये देखील नियमितपणे स्वच्छता केली जात आहे.

दरम्यान, शनिवारी दिवसभर मराठा आंदोलक दक्षिण मुंबईतील विविध भागात जाताना दिसत होते.

पोलिसांनी कायदा आणि सुव्यवस्थेचा प्रश्न निर्माण होऊ नये म्हणून मंत्रालय ते एयर इंडिया सिग्नल पर्यत पूर्णपणे बॅरिकेट लावले आहे.

आंदोलक मंत्र्यांच्या बंगल्यावर जाऊ शकतात म्हणून हा निर्णय घेण्यात आल्याची माहिती पोलीसांकडून देण्यात आली आहे.