प्रसादासाठी मोदकांना वाढती मागणी, अहमदनगरमध्ये बाप्पांसाठी चक्क सव्वाचार किलोचा मोदक

लाडक्या बाप्पाच्या आगमनाने सर्वत्र भक्तिमय वातावरण पाहायला मिळत आहे.

बाप्पाचा आवडता पदार्थ म्हणजेच मोदक आणि बाप्पाच्या आगमनानंतर वेगवेगळ्या पद्धतीचे मोदक बाजारात उपलब्ध झालेत.

अहमदनगर येथील महावीर स्विट्समध्येही यंदा प्रथम सव्वा किलोपासून ते सव्वाचार किलो पर्यंतचे मोदक बनविण्यात आले आहे.

मुंबई -पुणेच्या धर्तीवर यंदा मोठ्या आकारातील मोदक नगरमध्ये उपलब्ध झाले आहेत.

ड्राय फ्रुट्स, केशर , मावा, चॉकलेट, मँगो या फ्लेवरमध्ये हे मोदक उपलब्ध असून अतिशय आकर्षक पद्धतीने हे मोदक बनविण्यात आले आहेत.

खवा, काजू, आंबा व मावा अशा मोदकांच्या विविध प्रकारांनी दुकाने सजली असून, ग्राहकांची या पदार्थांना पसंती मिळत आहे

दूध व सुकामेव्याचे भाव वाढल्याने त्याचा परिणाम खाद्य पदार्थांवरही दिसून येत आहे.

मोदक तसेच अन्य मिठाईच्या दरात काहीशी वाढ झाली आहे.

गणेशोत्सवातील नैवैद्यासाठी अनेक संस्था, मंडळे प्रसादासाठी मिठाईच्या दुकांना संपर्क साधत आहेत.

गौरींच्या फराळासाठी बेसन, मोतीचुराचे लाडू, चकली, बर्फी, शंकरपाळी, अनारसे हे पदार्थ बनविण्यासाठी तयारी सुरू आहे.