Menstrual Cup Tips: मेनस्ट्रुअल कप वापरताना लक्षात ठेवा या महत्त्वाच्या गोष्टी!

टॅम्पॉन आणि पॅडचा पर्याय मेनस्ट्रुअल कप वापरण्यापूर्वी जाणून घ्या हे..

मेनस्ट्रुअल कप

मासिक पाळीदरम्यान मेनस्ट्रुअल कप वापरणं हे आरोग्यदायी, किफायतशीर आणि पर्यावरणपूरक पर्याय आहे. मात्र, याचा योग्य वापर करण्यासाठी काही गोष्टी लक्षात ठेवणं महत्त्वाचं आहे.

सर्वप्रथम, आपल्या वय, प्रसूतीचा अनुभव आणि पाळीचा प्रवाह पाहून योग्य आकाराचा कप निवडावा. पहिल्यांदा वापरण्यापूर्वी आणि प्रत्येक सायकलनंतर कप ५ ते १० मिनिटे उकळत्या पाण्यात निर्जंतुक करावा.

कप घालताना शरीर रिलॅक्स ठेवा आणि बसून किंवा उभं राहून ज्या पोझिशनमध्ये सोयीचं वाटतं तसं करा. कप घालताना C-फोल्ड किंवा पंच-डाउन फोल्ड यापैकी कोणतं तंत्र सोयीचं वाटतं ते वापरा.

एकदा कप घातल्यानंतर तो व्यवस्थित उघडला आहे का आणि सील बसलं आहे का हे बोटाने तपासा, त्यामुळे लीक होण्याची शक्यता कमी होते. कप काढताना तो जोराने ओढू नका; आधी तळाशी हलकं दाब देऊन व्हॅक्यूम ब्रेक करा आणि मग सावकाश बाहेर काढा.

साधारण ८ ते १० तासांनी कप रिकामा करावा, पण प्रवाह जास्त असल्यास लवकरही करू शकता. कप धुवताना फक्त पाण्याने स्वच्छ करा, सुगंधी क्लिनर किंवा साबण वापरू नका. वापरल्यानंतर कप कोरड्या आणि स्वच्छ ठिकाणी ठेवा.

Continues below advertisement

सुरुवातीच्या काही वेळा थोडं कठीण वाटू शकतं, पण थोड्या सरावाने ते अगदी सोपं होतं. जर वापरादरम्यान दुखापत, चुरचुर किंवा अस्वस्थता जाणवली, तर कपाचा आकार किंवा ब्रँड बदला आणि गरज असल्यास डॉक्टरांचा सल्ला घ्या.

योग्य पद्धतीने वापरल्यास मेनस्ट्रुअल कप हे आरामदायी, दीर्घकाळ टिकणारं आणि पर्यावरणपूरक साधन ठरू शकतं.

(टीप : वरील सर्व गोष्टी माहिती म्हणून वाचकांपर्यंत पोहोचवत आहोत. एबीपी माझा यातून कोणताही दावा करत नाही. )