Nitin Desai Death: 'थोडा वेळ आराम केला अन् मग घेतली फाशी...', मित्राने सांगितली नितीन देसाईंच्या आत्महत्येची संपूर्ण कहाणी

आश्चर्याची बाब म्हणजे, नितीन देसाईंनी स्व:कष्टाने आणि मेहनतीने उभारलेल्या एनडी फिल्म स्टुडिओमध्येच त्यांनी आत्महत्या केली. देसाईंना आर्थिक चणचण भासत असल्याने त्यांनी हे टोकाचं पाऊल उचलल्याचं बोललं जात आहे.

नितीन देसाईंनी हे टोकाचं पाऊल उचललं त्यावेळी त्यांचे जवळचे सहकारी दिलीप पिठवा हे देखील त्यांच्यासोबत स्टुडिओमध्ये उपस्थित होते, त्यांनी 1 ऑगस्टच्या रात्रीची संपूर्ण परिस्थिती सांगितली आहे.

ETimes शी बोलताना दिलीप म्हणाले, 'आम्ही दिल्लीहून आलो आणि थेट स्टुडिओत गेलो. देसाईंनी त्यांच्या अटेंडंटला थोडा वेळ आराम करायचा आहे असं बोलून बंगला उघडण्यास सांगितलं.'

काही वेळ विश्रांती घेतल्यानंतर ते बाहेर आले. काही काम असल्याचं सांगून दुसऱ्या मजल्यावर गेले आणि तिथे जाऊन त्याने आत्महत्या केली, असं स्टुडिओत उपस्थित असलेल्या त्यांच्या जवळच्या सहकाऱ्याने सांगितलं. नितीन देसाई आर्थिक अडचणीत होते, त्यांनी आपलं पवईचं कार्यालय विकल्याचं देखील कधी सांगितलं नाही, असंही ते म्हणाले.

दिलीप हे फक्त नितीन देसाई यांचे चांगले मित्र नाहीत, तर त्यांनी जोश, मेला, देवदास, हम दिल दे चुके सनम या चित्रपटात देसाईंसोबत एकत्र काम केलं आहे.

रायगडचे एसपी म्हणाले की, 'सेटवर काम करणाऱ्या एका कामगाराने याबाबत पोलिसांना माहिती दिली. सेटवर पोहोचलो तेव्हा नितीन देसाई यांचा मृतदेह लटकलेला होता.' प्रकरणाचा पुढील तपास पोलीस करत आहेत.

नितीन देसाईंच्या एनडी स्टुडिओजमध्ये मेला, जोश, मिशन कश्मीर, हम दिल दे चुके सनम, सलमान बॉम्बे, मुन्ना भाई एमबीबीएस, स्वदेस, प्रेम रतन धन पायो इत्यादी अनेक मालिका आणि चित्रपटांचे चित्रीकरण झाले आहे.