बॉलीवूडचे धरमपाजी हरपले! विलेपार्ले स्मशानभूमीबाहेर कलाकार दाखल होण्यास सुरुवात; पोलीस बंदोबस्त वाढवला

तब्बल सहा दशकं सिनेसृष्टीवर राज्य करणारा कोहिनूर हरपल्यानं मोठी पोकळी निर्माण झाली आहे. धर्मेंद्र यांच्या निधनानं अख्खं बॉलिवूड शोकसागरात बुडालं आहे.

dharmendra

बॉलीवूडचे ज्येष्ठ अभिनेते धर्मेंद्र यांचे वयाच्या 89 व्या वर्षी निधन झाले आहे. विलेपार्लेतील हिंदू स्मशानभूमीवर सध्या कलाकार दाखल होताना दिसत आहेत.

गेल्या काही दिवसांपासून प्रकृती अस्वास्थ्यामुळे धर्मेंद्र यांच्यावर मुंबईतील ब्रिच कँडी रुग्णालयात उपचार सुरू होते.

धर्मेंद्र यांना रुग्णालयातून डिस्चार्ज ही देण्यात आला होता. तेव्हापासून ते घरीच होते.अखेर जुहूतील राहत्या घरी त्यांनी अखेरचा श्वास घेतला.

ज्येष्ठ अभिनेते अमिताभ बच्चन, अभिषेक बच्चन यांच्यासह आमिर खान व इतर कलाकार स्मशानभूमीवर दाखल झाले आहेत.

धर्मेंद्र यांच्या पार्थिवावर अंत्यसंस्कार होत असल्याची माहिती मिळत आहे. सनी देओल यांनी धर्मेंद्र यांच्या पार्थिवाला मुखाग्नी दिल्याचं कळतंय.

अधिकृतरित्या देओल परिवाराने कोणतेही माहिती दिलेली नाहीये. काही वेळात परिवारातील सदस्य येऊन अधिकृत पुष्टी करेल असे सांगण्यात येत आहे.

या भागात सध्या पोलीस बंदोबस्त वाढवण्यात आला आहे. पवनार स्मशानभूमीच्या बाहेर सुरक्षा वाढवण्यात आली आहे.

साधारण तीन वाजताच्या सुमारास धर्मेंद्र यांच्या जुहू येथील घराबाहेर रुग्णवाहिका आली. ही रुग्णवाहिका विलेपार्ले येथील स्मशानभूमीवर आली.

या बातमीबद्दल प्रचंड गुप्तता पाळली गेली आहे. ठराविक लोकांनाच धर्मेंद्र यांच्याबाबत सांगण्यात आल्याचं कळतंय. तब्बल 6 दशक सिनेसृष्टीवर राज्य करणारा कोहिनूर हरपल्याची भावना समस्त मनोरंजनसृष्टीत आहे.