Mhada Lottery 2024 : म्हाडा मुंबईच्या लॉटरीसाठी अर्जदारांची यादी जाहीर करणार, डोमिसाईल प्रमाणपत्राबाबत घेतला मोठा निर्णय

Mhada Lottery 2024 : म्हाडानं मुंबईतील 2030 घरांसाठी लॉटरी जाहीर केली होती. या लॉटरीसाठी अर्ज दाखल करण्यास मुदतवाढ देण्यात आली होती.

म्हाडा मुंबई लॉटरी ड्रॉ

म्हाडानं मुंबईतील 2030 घरांसाठी सोडत जाहीर केली होती. या लॉटरीसाठी जवळपास 1 लाख 34 हजार उमेदवारांनी अर्ज दाखल केले होते. त्यापैकी 1 लाख 13 हजार 568 उमेदवारांनी अर्जांसोबत अनामत रक्कम जमा केली होती. त्यानंतर म्हाडानं ज्यांचं अर्जाचं शुल्क भरायचं राहिलं होतं त्यांना मुदवाढ दिली होती.

म्हाडाकडून मुंबईतील पहाडी गोरेगाव, वडाळा, विक्रोळी, दादर, कुर्ला, मालाड, दिंडोशी यासह विविध ठिकाणच्या घरांसाठी अर्ज मागवले होते.

म्हाडानं सुरुवातीला घरांच्या लॉटरीसाठी अर्ज करण्याची मुदत 4 सप्टेंबरपर्यंत ठेवली होती. मात्र, मुदतवाढ देत ती मुदत 19 सप्टेंबर पर्यंत वाढवण्यात आली होती. या निर्णयाचा म्हाडाला फायदा झाला.

म्हाडा आज पहिली अर्जदारांची यादी जाहीर करणार आहे. ही यादी जाहीर झाल्यानंतर त्यावर आक्षेप घेण्यासाठी वेळ दिला जाईल. त्यानंतर 3 ऑक्टोबरला अंतिम यादी जाहीर केली जाईल.

म्हाडाच्या घरांसाठी एक लाखांहून अधिक अर्ज दाखल झाल्यानं म्हाडाला केवळ अर्जांतून 5 कोटींहून अधिक उत्पन्न मिळालं आहे.

म्हाडानं पुढील सोडतीपासून डोमिसाईलच्या अटीमध्ये शिथिलता दिली आहे. अर्ज दाखल करताना जुनं डोमिसाईल चालू शकतं मात्र, घराचा ताबा घेण्यापूर्वी नवं डोमिसाईल जमा करावं लागेल. जे 1 जानेवारी 2018 नंतरचं असणं आवश्यक आहे.