मॉस्को : रशियात सध्या फुटबॉलची धूम सुरू आहे. फुटबॉल विश्वचषकाचे सामने पाहण्यासाठी जगभरातून अनेक फुटबॉलप्रेमी रशियात आले आहेत. याच दरम्यान शनिवारी रशियाची राजधानी मॉस्कोमध्ये एक अपघात झाला.

एका मद्यपी कारचालकाने बेदरकारपणे कार चालवत फुटबॉलप्रेमींना उडवले. या अपघातात आठ जण जखमी झाले आहेत, तर काहींना किरकोळ दुखापती झाल्या आहेत. परंतु, कुणालाही रुग्णालयात दाखल करण्यात आलेले नाही.

जखमींमध्ये मेक्सिकोच्या एका नागरिकाचा समावेश आहे. मद्यपी टॅक्सी चालकाला पोलिसांनी ताब्यात घेतलं आहे. या चालकाकडे किर्गिस्तानचा वाहन चालवण्याचा परवाना सापडला आहे.

जर्मनी आणि मेक्सिको यांच्यातील सामना रविवारी मॉस्कोमध्ये होणार आहे. ही लढत पाहण्यासाठी अनेक फुटबॉलप्रेमी मॉस्कोमध्ये दाखल झाले आहेत. काही फुटबॉल प्रेमी मेक्सिकोच्या संघाच्या रंगाप्रमाणे असलेले कपडे घालून जात होते. त्याचवेळी एका कारने त्यांना धडक दिली. अपघातानंतर कार चालकाने तेथून पळण्याचा प्रयत्न केला. मात्र लोकांनी त्यांना पकडून पोलिसांच्या ताब्यात दिले.