नेवासोटामध्ये 19 वर्षीय फ्रेझानिया थॉम्पसन रेल्वे ट्रॅकवर फोटोशूट करत होती. पण त्याच वेळी ट्रेन आली आणि धडकेत तिचा मृत्यू झाला.
रेल्वे ट्रॅकवरील तिचा हा शेवटचा फोटो सोशल मीडियावर व्हायरल होत आहे.
स्थानिक पोलिसांच्या माहितीनुसार, अपघाताच्या वेळी फ्रेझानिया गरोदर होती. एका ट्रेनमधून उतरुन ती रेल्वे ट्रॅकवर फोटो काढत होती. पण त्याचवेळी दुसऱ्या ट्रेनने तिला उडवलं.
"फ्रेझानियाचं हे पहिलं फोटोशूट होतं. तिला हेच काम करायचं होतं," असं फ्रेझानियाची आई हॅकेमी स्टिवेन्सन यांनी सांगितलं.
दुसरीकडे, ज्या ट्रेनने फ्रेझानियाला उडवलं, त्या ट्रेनची कंपनी, युनियन पॅसिफिकचे प्रवक्ते जेफ डी ग्राफ यांनी स्पष्टीकरण दिलं आहे. ते म्हणाले की, "रेल्वे ट्रॅकवर फोटोशूट सुरु असल्याचं आम्ही पाहिलं नाही. मात्र ट्रेन जवळ आल्यावर चालकांच्या टीमने फोटोग्राफर आणि इतरांना ट्रॅकवर पाहिलं. त्यांना अलर्ट करण्यात आलं. तसंच ट्रेन थांबवण्याचाही प्रयत्न केला."
दरम्यान पोलिस या प्रकरणाचा तपास करत आहे. परंतु घातपाताच्या शक्यता पोलिसांनी नाकारली आहे.