कॅलिफोर्निया : कॅलिफोर्नियातील सुपरमार्केटमध्ये झालेल्या गोळीबारात 21 वर्षीय भारतीय विद्यार्थ्याला जीव गमवावा लागला आहे. एका भारतीय वंशाच्या नागरिकासह चौघा लुटारुंनी दुकानात गोळीबार केला. कॅलिफोर्नियातील फ्रेस्नो सिटीमधील एका गॅस स्टेशन (पेट्रोल पंप)वर असलेल्या दुकानात ही घटना घडली. 21 वर्षांचा धरमप्रीत सिंग जेसर मंगळवारी रात्री ड्युटीवर होता. त्यावेळी चौघा आरोपींनी दुकानात घुसून लूटमार केली. घाबरलेला धरमप्रीत कॅश काऊंटरमागे लपला होता. मात्र पैसे आणि वस्तूंची लूट केल्यानंतर पळताना लुटारुंनी त्याच्यावर गोळी झाडली. बुधवारी सकाळी आलेल्या ग्राहकाने धरमप्रीतचा मृतदेह पाहून पोलिसांना या घटनेची माहिती दिली. मूळ पंजाबचा असलेला धरमप्रीत जेसर स्टुडंट व्हिसावर तीन वर्षांपूर्वी यूएसला गेला होता. अकाऊण्ट्स विषयाचं शिक्षण तो घेत होता. पोलिसांनी मुख्य संशयित असलेल्या भारतीय वंशाच्या 22 वर्षीय तरुणाला अटक केली आहे. त्याच्यावर हत्या आणि दरोड्याचा गुन्हा नोंदवण्यात आला आहे. पोलिस इतर आरोपींचा शोध घेत आहेत.