मुंबई : फेसबुक, इन्स्टाग्राम आणि व्हॉट्सअॅप हे नेटिझन्सचे जीव की प्राण असलेले सोशल मीडिया प्लॅटफॉर्म्स बुधवार संध्याकाळपासून काही काळासाठी डाऊन झाले. या तिन्हीअॅपवर फोटो-व्हिडिओ यासारख्या मीडिया डाऊनलोड करण्यात यूझर्सना अडचणी येत असल्याचं समोर आलं आहे.
व्हॉट्सअॅप, इन्स्टाग्राम आणि फेसबुक या समाजमाध्यमांशिवाय नेटिझन्सची पानही हलत नाहीत. मेसेज पाठवणे किंवा स्टेटस ठेवण्यात कोणतीही अडचण नसली, तरी फोटो, व्हिडिओ आणि ऑडिओ फाईल्सच्या डाऊनलोडिंगमध्ये प्रॉब्लेम होत आहे.
सुरुवातीला हा इंटरनेट प्रॉब्लेम असल्याचं काही जणांना वाटलं, त्यामुळे अनेकांनी आपले फोन रिस्टार्ट करुन पाहिले. मात्र हा त्रास इतरांनाही होत असल्याचं लक्षात आल्यावर तिन्ही प्लॅटफॉर्म डाऊन असल्याचं स्पष्ट झालं.
तीन महत्त्वाचे मेसेज आणि फोटो शेअरिंग अॅप स्लो डाऊन झाल्याचे पडसाद ट्विटरही उमटले आहेत. ट्विटरवर #whatsappdown #instagramdown #facebookdown हे तीन हॅशटॅग टॉप ट्रेंडमध्ये दिसत आहेत. जगभरातील विविध भागात हा प्रॉब्लेम असल्याची माहिती आहे.
या तिन्ही अॅपची मालकी फेसबुककडे आहे. मात्र याबाबत त्यांच्याकडून अद्याप कोणतीही अधिकृत माहिती देण्यात आलेली नाही.