मुंबई : रिलायन्स जिओच्या गिगा फायबरला टक्कर देण्यासाठी एअरटेलने मोठं पाऊल उचललं आहे. एअरटेलने आपल्या इंटरनेट टीव्ही बॉक्ससोबत नेटफ्लिक्स आणि एअरटेल एक्सस्ट्रीम अॅप सबस्क्रीप्शन मोफत देण्याचा निर्णय घेतला आहे.
या ऑफरनुसार यूजर्सला नेटफ्लिक्सचं 500 रुपयांचं सबस्क्रीप्शन मोफत मिळणार आहे. तर एक्सस्ट्रीम अॅपमध्ये यूजर्सला 1200 रुपयांचं एक वर्षाचं सबस्क्रीप्शन मिळणार आहे. एअरटेल इंटरनेट टीव्हीचा इंटरनेट बॉक्स एक स्मार्ट सेट टॉप बॉक्स आहे. एअरटेल इंटरनेट टीव्हीसोबत यूजर्सला डीटीएच एचडी सेवा आणि ओटीटी अॅप सेवा एकाचा प्लॅटफॉर्मवर मिळते.
इंटरनेट कनेक्शनच्या मदतीने या बॉक्समध्ये यूजर्स नेटफ्लिक्सशिवाय अॅमेझॉन प्राईम, जी-5, हॉटस्टार, सोनी LIV आणि इतर सेवा मिळतात. नवीन ऑफर्स नवीन बॉक्स खरेदी केल्यावरच मिळणार आहेत.
एअरटेल बॉक्स 2269 रुपयात मिळणार
एअरटेलने आपल्या इंटरनेट बॉक्सच्या किमतीत मोठी कपात केली आहे. या बॉक्सची किंमत आता 2269 रुपये आहे. यासोबत नव्या ऑफर्सनुसार ग्राहकांना 1700 रुपयांचा फायदा मिळणार आहे. याशिवाय यूजर्सना बॉक्ससोबत 699 रुपये किमतीचा एचडी चॅनल डीटीएच पॅकही मोफत मिळणार आहे.
एअरटेलने ऑगस्ट 2017 मध्ये एअरटेल इंटरनेट टीव्ही सेवा लॉन्च केली होती. त्यावेळी एअरटेल इंटरनेट टीव्हीची किंमत 4999 रुपये होती. मात्र जिओ फायबर सर्व्हिस लॉन्च झाल्यानंतर एअरटेलने आपल्या बॉक्सच्या किंमतीत मोठी घट केली. तसेच नवनवीन ऑफर्सही देण्याचा निर्णय घेतला आहे. जिओ फायबरची सेवा येत्या 5 सप्टेंबर पासून सुरु होत आहे. त्यामुळे ग्राहकांना खुश करण्यासाठी एअरटेलने हे पाऊल उचलल्याची चर्चा आहे.