सिंधुदुर्ग : कोकणातील सिंधुदुर्ग जिल्ह्यात स्थानिक स्वराज्य संस्थांच्या निवडणुकीची धामधूम सुरू असून राजकीय वातावरण चांगलेच तापले आहे. उपमुख्यमंत्री एकनाथ शिंदे यांच्या नेतृत्वाखालील शिवसेना आणि भाजप येथे स्वतंत्रपणे रिंगणात उतरले आहेत. सावंतवाडी नगरपरिषदेसाठी शिवसेनेतर्फे दीपक केसरकर (Deepak Kesarkar) स्वतः प्रचाराची धुरा सांभाळत आहेत, तर सावंतवाडी संस्थानच्या राजघराण्यातील श्रद्धा सावंत भोसले (Shraddha Sawant Bhosale) यांनी भाजपकडून नगराध्यक्षपदासाठी अर्ज दाखल केला आहे. त्यामुळे ही निवडणूक विशेष चर्चेत आहे. दरम्यान, भाजप उमेदवार श्रद्धा सावंत भोसले (Shraddha Sawant Bhosale) यांचा माध्यमांशी संवाद साधतानाचा एक व्हिडिओ काही दिवसांपूर्वी सोशल मीडियावर व्हायरल झाला होता. या व्हिडिओमध्ये त्या मराठीत बोलताना अडखळल्या असल्याचे दिसले, आणि यामुळे त्यांना सोशल मीडियावर ट्रोलिंगलाही सामोरे जावे लागले. त्या व्हायरल व्हिडीओमुळे त्या चांगल्याच चर्चेत आल्या होत्या.(Shraddha Sawant Bhosale)
Who is Shraddha Sawant Bhosale: कोण आहेत श्रद्धा सावंत भोसले?
भाजप उमेदवार श्रद्धा सावंत भोसले यांना सावंतवाडी संस्थानच्या राजघराण्याचा ऐतिहासिक वारसा लाभला आहे. त्या सावंतवाडी संस्थानचे शेवटचे राजे व माजी आमदार कै. श्रीमंत शिवरामराजे भोसले यांच्या नातसून आहेत. श्रद्धा भोसले यांचे पती लखम सावंत भोसले हे भाजप युवा मोर्चाचे विद्यमान प्रदेश उपाध्यक्ष आहेत. सावंतवाडी संस्थानचा हा वारसा आणि राजघराण्याची परंपरा लक्षात घेऊन भाजपनं नगरपरिषद निवडणुकीत नगराध्यक्षपदासाठी राजघराण्यातील उमेदवार मैदानात उतरवला आहे. त्यामुळे या निवडणुकीला अधिक राजकीय आणि ऐतिहासिक महत्त्व प्राप्त झाले आहे.तर सांवतवाडीला जगाच्या नकाशावर दाखवण्यासाठी, विकास करण्यासाठी आपण राजकारणात आलो असल्याचं श्रद्धा सावंत भोसले यांनी सांगितलं आहे.
Shraddha Sawant Bhosale: श्रद्धा सावंत भोसलेंचा जन्म मुंबईत शिक्षण अमेरिकेत
श्रद्धा भोसले यांचा जन्म मुंबई झाला, त्या उच्चशिक्षित आहेत. त्यांचे शिक्षण अमेरिकेमध्ये झाले आहे. त्या गुजरातमधील क्षत्रिय समाजाच्या आहेत. त्यांनी मराठी बोलण्याचा प्रयत्न केला, पण मराठी नीट बोलता येत नसल्यावरुन त्यांचा व्हिडिओ व्हायरल झाला आहे. त्या मूळ गुजरात येथील असून त्यांचे शिक्षण अमेरिका, लंडन येथे झाले आहे. त्यांचा विवाह 2019 साली राजघराण्यातील तिसरे युवराज लखमराजे भोसले यांच्याशी झाला. दरम्यान, सावंतवाडी नगर परिषदेत छाननी प्रक्रियेत नगराध्यक्षपदासाठी दाखल झालेल्या ११ अर्जापैकी ६ अर्ज वैध ठरले आहेत. यामध्ये उबाठा गटाच्या सीमा मठकर, भाजपकडून श्रद्धा सावंत भोसले, अन्नपूर्णा कोरगावकर अपक्ष, निशाद बुराण अपक्ष, शिवसेनेकडून अॅड. निता कविटकर आणि काँग्रेसकडून साक्षी वंजारी यांचे अर्ज वैध ठरले आहेत.