यासंदर्भात पालकमंत्री अजित पवार यांच्याकडे पीएमपीएमएल प्रशासनानं बस सेवा सुरू करण्याची मागणी केली होती. यासंदर्भात पालकमंत्री अजित पवार यांनी तत्त्वतः मान्यता दिली आहे. त्यामुळे 22 तारखेला गणेश चतुर्थीला पीएमपीएमएलचा श्री गणेशा होण्याची शक्यता आहे.
बस सेवा ठप्प असल्याने पीएमपीएमएलला मोठ्या प्रमाणात आर्थिक फटका बसला आहे. कर्मचाऱ्यांचे पगार देण्यासह देखभाल दुरुस्तीचा खर्चही आवाक्याबाहेर गेला आहे. पीएमपीएमएलला प्रतिदिन साधारण दीड कोटीपर्यंत उत्पन्न मिळतं, आतापर्यंत पीएमपीएमएलला साधारण 200 कोटीचा फटका बसला आहे. यासंदर्भात सोमवारी पुणे आणि मंगळवारी चिंचवड मनपा आयुक्त आणि पीएमपीएमएल प्रशासनाची महत्त्वपूर्ण बैठक झाली.
पहिल्या टप्प्यात साधारण 400 ते 450 बसेस शहरात सुरू होणार आहेत. कोरोना प्रतिबंधित क्षेत्राच्या बाहेर बस सेवा सुरू होणार असल्याची माहिती आहे. नागरिकांच्या प्रतिसादानंतर टप्प्याटप्प्याने संपूर्ण शहरात पीएमपीएमएल सुरू होणार आहे. या निर्णयामुळं सर्वसामान्य पुणेकरांना मोठा दिलासा मिळणार आहे.
कोरोनाच्या पार्श्वभूमीवर सोशल डिस्टन्स संभाळत मर्यादित प्रवाशांना परवानगी दिली जाणार आहे. बस दिवसातून दोन-तीन वेळा निर्जंतुक केली जाईल तसेच बसमध्ये मास्क बंधनकारक करण्यात येणार आहे.