इंदापूर: पुणे ग्रामीण पोलीस दलातील कर्मचारी पोलीस हवालदार विष्णू केमदारणे हे काल (मंगळवारी) पहाटेपासून इंदापूर पोलिस ठाण्याच्या शासकीय वसाहतीतून बेपत्ता झाले आहेत. विष्णू केमदारणे यांनी लिहिलेली एक चिठ्ठी देखील समोर आली असून या चिठ्ठीतून त्यांनी इंदापूर पोलीस ठाण्याचे पोलीस निरीक्षक सूर्यकांत कोकणे यांच्यासह अन्य दोन पोलीस कर्मचाऱ्यांवर गंभीर आरोप केले आहेत. मागील दोन महिन्यांपासून पोलीस निरीक्षक सूर्यकांत कोकणे यांनी पोलीस हवालदार रासकर आणि पोलीस कॉन्स्टेबल सूर्यवंशी यांच्या सांगण्यावरून जीवे मारण्याची धमकी दिली आहे. तुझी नोकरी व यापुढील आयुष्य हे उध्वस्त करून टाकेल, अशी भाषा वापरून मला जीवे मारण्याची धमकी दिली आहे असं या चिठ्ठीत लिहिलेलं आहे.
विष्णू केमदारणे यांनी त्यांच्या पत्नीच्या मोबाईलवरती देखील एक कॉल रेकॉर्डिंग ऑडिओ देखील पाठवलेला आहे. माझ्या या अवस्थेला, होणाऱ्या परिणामांना पोलीस निरीक्षक सूर्यकांत कोकणे हेच जबाबदार आहेत असंही या चिठ्ठीमध्ये लिहिण्यात आलं आहे. या संपूर्ण खळबळजनक घटनेनंतर इंदापूर पोलीस ठाण्यात विष्णू केमदारणे यांच्या पत्नी प्रियंका केमदारणे यांनी आपले पती हरवल्याची तक्रार देखील दाखल केली असून पोलीस निरीक्षक सूर्यकांत कोकणे यांना सवाल उपस्थित केला आहे. खात्या व्यतिरिक्त तुम्ही माझ्या पतीला वैयक्तिक धमकी का देताय, माझ्या पतीला न्याय मिळाला पाहिजे, अन्यथा मी माझ्या मुलाबाळांसह इंदापूर पोलीस ठाण्यासमोर आत्महत्या करेल असा इशारा प्रियंका केमदारणे यांनी दिला आहे.
केमदारणेंना शोधण्यासाठी पोलिस पथक तयार
चिठ्ठीद्वारे केलेल्या आरोपांची वरिष्ठ कार्यालयाकडून चौकशी होणार असल्याची माहिती उपविभागीय पोलीस अधिकारी सुदर्शन राठोड यांनी दिली आहे. इंदापुरातून पोलीस हवालदार विष्णू केमदारणे हे काल (मंगळवारी) पहाटेपासून बेपत्ता झालेत. केमदारणे यांनी एक चिठ्ठी लिहून ठेवली असून या चक्कीतून वरिष्ठ पोलीस अधिकाऱ्यांवर त्यांनी जीवे मारण्याची धमकी दिल्याचा आरोप केल्याने पोलिस दलात खळबळ उडाली आहे. या संदर्भात उपविभागीय पोलीस अधिकारी सुदर्शन राठोड यांनी प्रतिक्रिया दिली असून संबंधित पोलीस कर्मचाऱ्यांच्या पत्नीची तक्रार दाखल करून घेतली आहे. पोलीस खात्याकडून या संबंधित कर्मचाऱ्यांचा शोध घेतला जात असून त्यासाठी पोलीस पथक तयार करण्यात आले आहे. चिठ्ठीमध्ये केमदारणे यांनी जे आरोप केले आहेत त्या आरोपांची वरिष्ठ कार्यालयाकडून चौकशी केली जाईल आणि त्या पद्धतीचा अहवाल कार्यालयाला पाठवला जाईल अस उपविभागीय पोलीस अधिकाऱ्यांनी म्हटलं आहे.
केमदारणे इंदापूर पोलीस ठाण्यामध्ये कार्यरत होते. मात्र, 27 एप्रिल रोजी त्यांचा इंदापूर पोलीस ठाण्याकडील पदभार काढण्यात आला होता अशी माहिती आहे. तर भिगवण पोलीस ठाण्यामध्ये त्यांना रुजू होण्यासाठी कळवण्यात आलं होतं. मात्र केमदारणे यांनी भिगवन पोलीस ठाण्याचा पदभार स्वीकारला नव्हता. प्रियंका केमदारणे यांनी दिलेल्या माहितीनुसार, आपण सकाळी झोपेतून उठायच्या आधीपासून आपले पती घरी नाहीत. ते सकाळी झोपेतून उठल्यानंतर क्रिकेट खेळण्यासाठी जातात. आठ वाजून गेल्यानंतर मी त्यांच्या सर्व मित्रांकडे चौकशी केली. साडेआठ वाजता माझा मोबाइल बघितला. त्यावेळी आपल्या पतीने मोबाइलवर रेकॉर्डिंग व चिठ्ठी पाठवल्याचे दिसले. तीच चिठ्ठी नंतर घरातील ड्रॉवरमध्ये आढळली. पोलिस निरीक्षक सूर्यकांत कोकणे, विनोद रासकर व सूर्यवंशी यांची नावे या चिठ्ठीत होती. त्यांनी जिवे मारण्याची धमकी दिली, असे चिठ्ठीत लिहिले होते, अशी माहिती प्रियंका यांनी दिली.
विष्णू केमदारणेंच्या चिठ्ठीमध्ये काय लिहलंय
मला मागील दोन महिन्यांपासून पोलिस निरीक्षक सूर्यकांत कोकणे यांनी हवालदार विनोद रासकर व पोलिस कर्मचारी सूर्यवंशी यांच्या सांगण्यावरून तुझी नोकरी व पुढील आयुष्य उद्ध्वस्त करून टाकेन, अशी भाषा वापरून जिवे मारण्याची धमकी दिली आहे. माझ्या या अवस्थेला व पुढे होणाऱ्या परिणामांना हे तिघे जबाबदार आहेत, असे विष्णू केमदारणे यांनी चिठ्ठीत म्हटले आहे. त्या कथित कॉल रेकॉर्डमध्ये पोलिस निरीक्षक कोकणे यांचा आवाज असल्याचे सांगितले जात आहे.27 एप्रिलला केमदारणे यांच्याकडील इंदापूर पोलिस ठाण्यातील पदभार काढून त्यांना भिगवण पोलिस ठाण्यात रुजू होण्यास सांगण्यात आले होते. मात्र, ते हजर झाले नाही.