पुणे : शहरात 10 दिवसांपूर्वी झालेल्या कोथरूड (Pune) गोळीबार प्रकरणात गुंड निलेश घायवळ (Nilesh ghaywal) याच्यासह 10 जणांवर पोलीस आयुक्त अमितेश कुमार यांनी महाराष्ट्र संघटित गुन्हेगारीविरोधी कायद्यानुसार (मकोका) कारवाई केली आहे. पोलीस ठाण्यापासून शंभर ते दोनशे मीटर अंतरावर एका तरुणावर केलेल्या गोळीबाराच्या गुन्ह्यामध्ये ही कारवाई करण्यात आली आहे. या घटनेनंतर मुख्य आरोपी असलेला निलेश घायवळ लंडनला पळून गेल्याची माहिती पोलिस तपासातून समोर आली असून पोलिसांनी त्याच्या कोथरुड येथील घरावर धाड टाकली. या धाडीत त्याच्या घरातून 2 स्कॉर्पिओ आणि 2 दुचाकी गाड्या जप्त करण्यात आल्या आहेत.
निलेश घायवळ लंडनला पळून गेल्याचं पोलिस तपासातून समोर आलं असून त्याने पासपोर्ट आपल्याकडे जमाच केला नाही, असं पोलिसांनी म्हटलं. तसेच, त्याच्याबाबत लूकआऊट नोटीस जारी करण्यात आली असून भारतात परत येताच त्याला अटक करण्यात येईल, असेही पोलिसांनी स्पष्ट केलं. निलेश घायवळने गुन्हेगारी कृत्यामधुन खूप मोठ्या प्रमाणात पैसा कमावला असून त्यातूनच त्याने लंडनमध्ये घर घेतलं आहे. निलेशचा मुलगाही लंडनमध्ये हायफाय ठिकाणी शिक्षण घेत असल्याचं पोलिसांनी सांगितलं. त्यामुळेच, पोलिसांनी आता त्याच्या कोथरुड येथील घरातून कारवाईला सुरुवात केली आहे. लंडनला पळून गेलेल्या गुंड निलेश घायवळच्या पुण्यातील कोथरुड भागातील घराची पुणे पोलिसांनी संध्याकाळच्या सुमारास झाडाझडती घेतली. यावेळी घायवळच्या दोन स्कोर्पिओ आणि दोन दुचाकी पोलिसांनी जप्त केल्या आहेत. त्यामुळे, लंडनमध्ये पळून जाऊन ऐशोआरामात जगणाऱ्या निलेश घायवळला पुणे पोलिसांनी चांगलाच दणका दिला आहे. तसेच, यापूर्वीच त्याच्याबाबत लुक आऊट नोटीस जारी करण्यात आल्याने त्याला भारतात आल्यास कधीही अटक होऊ शकते.
पुणे पोलिसांनी आज निलेश घायवळच्या घरी धाड टाकत 2 स्कॉर्पिओ कार आणि 2 दुचाकी जप्त केल्या आहेत. याशिवाय, कोथरुडमधील हल्ल्यात सहभागी असलेल्या इतर सात आरोपींच्या घराची देखील पोलिसांनी झडती घेतली. तर, कोथरुडमध्ये 17 सप्टेंबरच्या मध्यरात्री नागरिकांवर झालेल्या हल्ल्यात सहभागी असलेल्या कोथरुड भागातील 7 आरोपींची कोथरुड भागातून पोलिसांनी धींड देखील काढली. सायंकाळच्या सुमारास तोंडावर काळे कापड बांधून पोलिसांनी आरोपीला भररस्त्यातून मिरवल्याने कोथरुडसह पुण्यातील गुन्हेगारी वर्तुळात याची चांगलीच चर्चा रंगली आहे. विशेष, म्हणजे आज सकाळीच हडपसर पोलिसांनी काही गुंड, दरोडेखोरांना गुडघ्यावर रांगत त्यांची धिंड काढल्याचं पाहायला मिळालं होतं.
दरम्यान, आत्तापर्यंत पोलिसांनी आरोपी मयूर गुलाब कुंबरे, राऊत, चदिलकर, फाटक, व्यास यांना अटक करण्यात आली असून, इतर फरार आरोपींचा पोलीस शोध घेतला जात आहे.