Tanaji Sawant : शिवेसेनचे मंत्री एकनाथ शिंदे यांनी बंडखोरी केल्यामुळं राज्यातील राजकीय वातावरण चांगलच तापलं आहे. एकनाथ शिंदे हे शिवसेनेचे जवळपास 40 आमदार घेऊन आसाममधील गुवाहटीत पोहोचले आहेत. त्यामुळं राज्यातील शिवसैनिक चांगलेच आक्रमक झाले आहे. काही ठिकाणी आंदोलने, मोर्चे निघत असल्याचं चित्र दिसत आहे. अशातच शिवेसेनेचे भूम-परांडा तालुक्याचे बंडखोर आमदार तानाजी सावंत (Tanaji Sawant) यांच्या कार्यालयावर शिवसैनिकांनी हल्ला केल्याची घटना घडली आहे. तानाजी सावंत यांच्या पुण्यातील कार्यालयावर हल्ला करण्यात आला असून, त्यांच्याविरोधात जोरदार घोषणाबाजी करण्यात आली आहे.

  सध्या राज्यात अनेक नाट्यमय घडामोडी घडत आहे. शिवसेनेच्या आमदारांनी बंडोखोरी केल्यामुळं शिवसैनिक चांगलेच आक्रमक झाले आहेत. बंडखोर आमदारांच्या विरोधात पवित्रा शिवसैनिक पवित्रा घेत असल्याचे चित्र दिसत आहे. तानाजी सावंत यांच्या पुण्यातील कार्यलयावर शिवसैनिकांनी हल्ला केला आहे. या घटनेनंतर तानाजी सावंत यांच्या पुण्यातील निवासस्थाना बाहेर पोलीस बंदोबस्तात वाढ करण्यात आली आहे. त्या ठिकाणी तणावाचे वातावर दिसत आहे. शिवसैनिकांनी मोठ्या प्रमाणात जमले असून तानाजी सावंत यांच्याविरोधात घोषणाबाजी करत आहेत. तानाजी सावंत भूम परांडा विधानसभा मतदारसंघाचे आमदार आहे. 2014 साली शिवसेना भाजपच्या सत्तेत तानाजी सावंत यांच्यावर मंत्रीपदाची जबाबदारी देण्यात आली होती. मात्र, 2019 ला महाविकास आघाडी सरकार सत्तेत आल्यावर शिवसेनेनं तानाजी सावंत यांनी मंत्रीपदाची संधी दिली नाही. तेव्हापासूनच तानाजी सावंत नाराज असल्याची चर्चा होती. अखेर बंडखोरी करत ते एकनाथ शिंदे यांच्या गटात सामील झाले आहेत.

 शिवसेनेशी गद्दारी करणाऱ्यांविरोधात आमचा लढा

दरम्यान, आज तानाजी सावंत यांच्या पुण्यातील कार्यालयावर हल्ला केल्यानंतर पर्वती विधानसभा मतदारसंघाचे विभागप्रमुख सुरज लोखंडे यांच्याशी संपर्क साधला. यावेळी त्यांनी सांगितले की, शिवसेनेशी गद्दारी करणाऱ्यांविरोधात आमचा लढा आहे. हे आमदार शिवसैनिक नाहीत. शिवसेना काय आहे ते यांना माहिती नाही. तानाजी सावंतांना मंत्रीपद न दिल्यामुळं ते नाराज होते. ते भाजपमध्ये जाण्याच्या चर्चाही होत्या असे लोखंडे म्हणाले. मोठ्या संख्येनं कार्यकर्ते या आंदोलनात सामील होते. ही सुरुवात असल्याचा इशारा सुरज लोखंडे यांनी दिला. आमचा आक्रोश हा शिवसेनेशी गद्दारी करणाऱ्यांशी तसेच शिवसेनेच्या जीवावर मोठं होणाऱ्या बंडखोरांशी आहे. त्यांची ताकद असेल तर त्यांनी धनुष्यबाणाचं चिन्ह आणि बाळासाहेबांचा फोटो न वापरता निवडून येऊन दाखवावं असेही लोखंडे यावेळी म्हणाले.