28 वर्षीय कुणाल बारपट्टे हे या विमानात नेव्हिगेटर म्हणून कार्यरत होते. निगडी प्राधिकरणातील सिंधुनगर एलआयजी कॉलनीमधील ते रहिवासी आहेत. राजेंद्र आणि विद्या बारपट्टे यांचे ते ज्येष्ठ पुत्र आहेत. त्यांना एक धाकटा भाऊ आहे.
विमान बेपत्ता झाल्याची माहिती समजल्यावर बारपट्टे परिवाराला मोठा धक्का बसला. हा धक्का सहन न झाल्याने कुणाल यांच्या आई-वडिलांना रुग्णालयात दाखल करावे लागले.
कुणाल यांचे मामा दिनेश पाटील यांनी हवाई दलाशी संपर्क साधण्याचा प्रयत्न केला, मात्र काहीही माहिती मिळू न शकल्याने चिंतेत भरच पडली. या घटनेबाबत संरक्षणमंत्री पर्रिकर यांनी ट्विटरवर केलेल्या ट्विटवर दिनेश पाटील यांनी कुणाल यांच्याविषयी विचारणा केली.
त्यानंतर हवाई दलाचे अधिकारी सातत्याने बारपट्टे परिवाराच्या संपर्कात आहेत. त्यांच्याकडूनही ठोस माहिती मिळत नसल्याने बारपट्टे परिवाराची अस्वस्थता वाढली आहे.
हवाईदलाच्या विमानाचा 48 तासानंतरही पत्ता नाहीच
वायूदलाचं ‘AN-32’ हे विमान गायब होऊन 48 तास उलटून गेले आहेत. त्यामुळे हे विमान सापडण्याची शक्यता धुसर होत चालल्याचं म्हटलं जात आहे. संरक्षणमंत्री मनोहर पर्रीकर यांनी चेन्नईत जाऊन परिस्थितीचा आढावा घेतला.
या मोहिमेत महत्त्वाची भूमिका बजावत असलेल्या पी8आय या विमानातून संपूर्ण शोधमोहीमेची माहिती पर्रीकर यांनी घेतली आहे. मात्र 48 तास उलटूनही विमानाचा काही थांगपत्ता नसल्यामुळे चिंतेची बाब बनली आहे.
या विमानाने 29 जणांना घेऊन शुक्रवारी सकाळी पावणे नऊच्या सुमारास चेन्नईच्या तंबराम बेसवरुन उड्डाण भरलं. मात्र 16 मिनीटांच्या प्रवासानंतर या विमानाचा मुख्य रडार यंत्रणेशी संपर्क तुटला. ‘AN-32’ या विमानात सहा क्रू मेंबरसह 29 जण आहेत.