पुणे : दुचाकीतून पेट्रोल काढताना पकडल्याने चोरट्यांनी एकाच कुटुंबातील तिघांवर धारदार शस्त्राने वार केलेत. शनिवारी मध्यरात्री पुण्यातील बिबेवाडीतील एका सोसायटीमध्ये ही घटना घडली. बिबवेवाडी पोलीस स्टेशनमध्ये याप्रकरणी गुन्हा दाखल करण्यात आला आहे. नागरिकांनी यातील दोन चोरट्यांना पकडले असून अन्य एक फरार झाला आहे.
तुषार पोपट फडतरे (वय 29), पोपट बाबुराव फडतरे (वय 55) आणि सुनिता फडतरे (वय 49) अशी जखमी झालेल्यांची नावे आहेत. याप्रकरणी तुषार फडतरे यांनी फिर्याद दिली आहे. पोलिसांनी दिलेल्या माहितीनुसार, फिर्यादी तुषार फडतरे हे बिबवेवाडीतील पुरंदर निवास येथे राहतात. शनिवारी मध्यरात्री त्यांनी पार्क केलेल्या दुचाकीच्या ठिकाणी आवाज आल्यामुळे त्यांनी खाली येऊन पाहिले असता तिघेजण दुचाकीतून पेट्रोल काढत असल्याचे त्यांच्या निदर्शनास आले. त्यामुळे फिर्यादी यांनी भाडेकरूंच्या मदतीने त्यातील दोघांना पकडले तर एक जण पळून गेला.
दरम्यान पळून गेलेला चोरटा काही वेळात आणखी काही साथीदारांना घेऊन त्या ठिकाणी परत आला आणि त्याने फिर्यादी आणि त्यांच्या आईवडिलांसोबत भांडण केले. त्याचवेळी त्याने त्यांच्यावर धारदार शस्त्राने वार केले. घटनेनतंर आरोपी पसार झाले आहेत. जखमींवर सध्या खाजगी रुग्णालयात उपचार सुरु असून बिबेवाडी पोलीस अधिक तपास करत आहेत.