मुंबई : देशाचे परिवहनमंत्री नितीन गडकरी यांनी काही दिवसांपूर्वी इलेक्ट्रीक बसमध्ये (Bus) हवाई सुंदरीप्रमाणे बस सुंदरी असणार असल्याचे पुण्यातील एका कार्यक्रमात बोलताना सांगितले होते. त्यानंतर, आता पुणे मार्गावर धावणाऱ्या एसटीच्या ई-शिवनेरी बसमध्ये प्रवाशांना मदत करण्यासाठी हवाई सेवेच्या धर्तीवर आदरातिथ्य व्यवस्थापनाची सेवा देणारी परिचारिका (शिवनेरी सुंदरी) नेमण्यात येणार असल्याचे महाराष्ट्र परिवहन महामंडळाचे नवनिर्वाचित अध्यक्ष भरत गोगावले यांनी सांगितले. विशेष म्हणजे प्रवाशांच्या तिकिटावर कोणताही अधिभार न लावता प्रवाशांना चांगल्या सेवा सुविधा देऊन गुणात्मक सेवेचा दर्जा उंचावेल अशी अभिनव योजना भविष्यात सुरू करण्यात येणार आहे. मात्र, आता या योजनेवरुन आरोप प्रत्यारोप सुरू झाले आहेत. भरत गोगावले यांच्या विधानाचा संदर्भ देत आमदार जितेंद्र आव्हाड (Jitendra Awhad) यांनी अनेक प्रश्न उपस्थित केले आहेत. तसेच, या निर्णयाबद्दल भरत गोगावलेंचे पायच धरायला पाहिजे, असेही त्यांनी म्हटले.
एसटी महामंडळाचे नवे अध्यक्ष भरत गोगावले यांच्या अध्यक्षतेखाली 304 वी संचालक मंडळाची बैठक पार पडली. या बैठकीमध्ये विविध खात्याच्या तब्बल 70 पेक्षा जास्त विषयांवर चर्चा होऊन त्यांना मान्यता देण्यात आली. त्यापैकी, मुंबई-पुणे मार्गावर धावणाऱ्या ई-शिवनेरी बसमध्ये प्रवाशांना मदत करण्यासाठी परिचारिका नेमण्यास मान्यता देण्यात आली आहे. त्यावरुन, आता वाद निर्माण झाल्याचं दिसून येतं. राष्ट्रवादीचे आमदार जितेंद्र आव्हाड यांनी या योजनेवरुन अनेक सवाल उपस्थित केले आहेत.
शिवनेरी बसमधील या महिलांना छत्री द्यावी लागेल, कारण बसमध्ये पावसाचं पाणी गळत आहे. विमान आणि बसची तुलना करणे म्हणजे भरत गोगावले यांचे पाय धरले पाहिजे, अशा शब्दात जितेंद्र आव्हाड यांनी या योजनेवर खिल्ली उडवली. तसेच, एसटी महामंडळाकडे चार चांगल्या बस नाहीत, चांगले ड्रायव्हर ठेवू, चांगले कंडक्टर ठेवू असं काहीतरी बोला. या सुंदरी काय करणार आहेत, बसमध्ये काय सेवा देणार आहेत? काय खायला देणार आहेत, काय प्यायला देणार आहे?, असे सवाल आव्हाड यांनी उपस्थित केले आहेत. शिवनेरी सुंदरी नेमकं करणार काय आहेत ते आधी सांगा. शिवनेरी सुंदरी काम काय करणार आहे फक्त भरत भोगावले यांनी सांगाव, असंही आव्हाड यांनी म्हटलं.
आनंद आरोग्य केंद्र
मुख्यमंत्री एकनाथ शिंदे यांच्या संकल्पनेतील स्वर्गीय आनंद दिघे यांच्या स्मरणार्थ एसटीच्या 343 बस स्थानकांवर "आनंद आरोग्य केंद्र" या नावाने दवाखाना सुरू करण्यात येणार असून, अत्यंत माफक दरामध्ये बस स्थानकांवरील प्रवाशां बरोबरच आसपासच्या सर्व नागरिकांना कमी दरामध्ये विविध आरोग्य चाचण्या व औषधे एकाच छताखाली उपलब्ध करून देण्यात येणार आहे. यासाठी संबंधित संस्थांना बसस्थानकांवरील ४०० ते ५०० चौ.सेमी. ची जागा उपलब्ध करून देण्यात येईल. तेथे त्या संस्थेने आरोग्य तपासणी दवाखाना, पॅथॉलॉजी लॅब व औषध दुकान सुरू करून सेवा द्यावयची आहे.
प्रत्येक बस स्थानकांवर महिला बचत गटांना स्टॉल उघडण्यास जागा
एस.टी.महामंडळाच्या प्रत्येक बस स्थानकांवर त्या परिसरातील महिला बचत गटांना आपले स्थानिक पदार्थ विक्री करण्यासाठी चक्रीय पद्धतीने नाममात्र भाडे आकारुन१०X१० आकाराचा स्टॉल उपलब्ध करून देण्यात येणार आहे. उपरोक्त निर्णयाबरोबरच नवीन 2500 साध्या बसेस खरेदी करण्याची निविदा प्रक्रिया सुरू करणे तसेच 100 डिझेल बसेसचे प्रायोगिक तत्त्वावरील इलेक्ट्रिक बसमध्ये रूपांतर करणे अशा विविध विषयांना या बैठकीमध्ये मान्यता देण्यात आली.