Operation Tiger: नाशिक महापालिकेच्या (Nashik Municipal Corporation) राजकारणात सध्या 'ऑपरेशन टायगर' (Operation Tiger) आणि नगरसेवकांच्या संभाव्य पक्षांतराच्या चर्चेने प्रचंड धुमाकूळ घातला आहे. ठाकरे गटाच्या (Shiv Sena UBT) 15 नगरसेवकांनी एकत्र येत, 5 कोटी रुपयांच्या निधीचे आमिष दाखवून 'एजंट' माध्यमातून फूट पाडण्याचा प्रयत्न होत असल्याचा गंभीर आरोप शिंदेंच्या शिवसेनेवर केला होता. या आरोपांना आता शिंदेंच्या शिवसेनेचे गटनेते अजय बोरस्ते (Ajay Boraste) यांनी जोरदार प्रत्युत्तर दिले असून, ठाकरेंच्या शिवसेनेतील अस्वस्थतेतूनच हे आरोप होत असल्याचा दावा केला आहे.
नाशिक महापालिकेत ठाकरे गटाचे एकूण 15 नगरसेवक निवडून आले आहेत. शिंदे गटाकडून प्रभागनिहाय निधी आणि उपमहापौर पदाचा सौदा करण्यासाठी एका वकीलाला एजंट म्हणून पाठवले जात असल्याचा आरोप ठाकरे गटाचे गटनेते केशव पोरजे (Keshav Porje) यांनी केला होता. आमचा एकही शिलेदार फुटणार नाही, असे सांगत पोरजे यांनी थेट 'ऑपरेशन तुडवा' राबवण्याचा इशारा दिला होता. घरगुती कारणांमुळे दोन नगरसेवक गैरहजर असले तरी त्यांच्या नातेवाईकांनी उपस्थित राहून ठाकरेंची एकजूट दाखवून दिली होती.
Ajay Boraste: अजय बोरस्तेंचा पलटवार
ठाकरे गटाच्या या आक्रमक पवित्र्यानंतर शिंदे गटाचे गटनेते अजय बोरस्ते यांनी हे सर्व आरोप हास्यास्पद असल्याचे म्हटले आहे. उपमुख्यमंत्री एकनाथ शिंदे (Eknath Shinde) हे शब्द पाळणारे नेते असून, त्यांच्याकडे कोणताही घोडेबाजार चालत नाही, असे बोरस्ते यांनी स्पष्ट केले. तसेच, विधान परिषद निवडणुकीत ठाकरे गटाच्या लोकांनी ज्या गोकुळ गिते यांना मतदान केले होते, तेच आता थेट शिंदे साहेबांच्या सोबत आले आहेत, याकडे लक्ष वेधत त्यांनी आगामी काळात नाशिकमध्ये मोठे राजकीय फेरबदल होण्याचे संकेत दिले आहेत.
Ajay Boraste: नेमकं काय म्हणाले अजय बोरस्ते?
अजय बोरस्ते म्हणाले की, "आरोप हास्यास्पद आहे, यातून त्याच्या पक्षातील अस्वस्थता समोर येत आहे. आमच्यावर जे आरोप केले जात आहेत ते चुकीचे आहेत. कोण एजंट आहे, कोण आमची वकिली करतो हे आम्हालाही कळू द्या, आम्ही शोध घेऊ. आम्हाला कोणत्याही एजंटची गरज नाही. एकनाथ शिंदे यांच्या कामांकडे बघून कोणीही आले तर सांगता येत नाही. आमच्यावर आरोप करून त्यांची अस्वस्थता बाहेर येत आहे. राज्यभरात प्रवेश होत आहे, त्यात नाशिकमध्ये काही प्रवेश झाले तर आश्चर्य वाटायला नको. उबाठाच्या लोकांनी गोकुळ गिते यांना मतदान केले, आता त्यांच्या माध्यमातून काही झाले तर माहिती नाही. एकनाथ शिंदे शब्द पाळणारे नेते आहेत, त्यांच्याकडे घोडेबाजार चालत नाहीत. गोकुळ गिते यांनी यांना उबाठाने मतदान केले ते आता शिंदे साहेबांच्या सोबत आहेत, त्यामुळे कुच्छ भी हो सकता है," असे त्यांनी म्हटले आहे.
राज्य आणि देश-विदेशातील महत्त्वाच्या बातम्या; पाहा व्हिडीओ
आणखी वाचा