Avinash Jadhav On Prasad Vedpathak: मुंबईत जैन साध्वींसाठी मारलेल्या पांढऱ्या पट्टीचा (Jain Community White Line Controversy) मुद्दा सध्या चांगलाच चर्चेत आहे. प्रसिद्ध सोशल मीडिया इन्फ्लुएन्सर, कंटेंट क्रिएटर आणि युट्यूबर प्रसाद वेदपाठकने (Prasad Vedpathak) सोशल मीडियावर याबाबत पोस्ट शेअर केली होती. त्यानंतर मुंबईत रस्त्यांवर मारलेल्या पांढऱ्या पट्ट्यांवरुन विविध प्रतिक्रिया उमटत आहेत. मनसेने देखील आक्रमक पवित्रा घेत तात्काळ पांढऱ्या पट्ट्या हटवण्यात याव्या, अन्यथा आम्ही काळा रंग मारु, असा इशारा देण्यात आला.
सदर प्रकरणानंतर माझ्या जीवाला धोका असल्याचा दावा प्रसाद वेदपाठकने केला आहे. काही लोक माझा पाठलाग करत आहेत. माझ्या जीवाला धोका आहे, प्लीज माझी मदत करा, असं म्हणत प्रसादने म्हटलं आहे. दरम्यान, प्रसाद वेधपाठकने काल मनसेचे नेते अविनाश जाधव यांची भेट घेतली. या भेटीनंतर अविनाश जाधव यांनी पोस्ट करत प्रतिक्रिया दिली. तसेच मनसे नेहमी तुझ्यासोबत आहे, असा शब्दही अविनाश जाधव यांनी प्रसादला दिला. (Prasad Vedpathak Meet Avinash Jadhav)
अविनाश जाधव काय म्हणाले? (Prasad Vedpathak Meet Avinash Jadhav)
आमची बांधिलकी जनतेशी आहे.. आपण जो आवाज उठवला आहे, तो एका वृती विरोधात आहे.. योग्य गोष्टीच्या मागे मनसे नेहमीच उभी राहते आणि राहणार.. आम्ही मतांसाठी नाही तर अस्मितेसाठी लढतो, असं अविनाश जाधव म्हणाले.
प्रसाद वेदपाठकचं इन्स्टा अकाउंट सस्पेंड (Prasad Vedpathak Instagram Account Suspended)
पांढरी पट्टी हटवल्याच्या प्रसाद वेदपाठकच्या पोस्टवर आता काही जैन धर्मीय आक्रमक होत वादग्रस्त पोस्ट करत आहेत. तसेच, काही दिवसांपूर्वीच प्रसादनं काही जैन धर्मीय माझ्या अकाउंटवर मास रिपोर्टींग करत असल्याचा दावाही केलेला. याचाच परिणाम म्हणून प्रसाद वेदपाठकचं इन्स्टा अकाउंट सस्पेन्ड करण्यात आलं असल्याचं बोललं जात आहे. अकाउंट सस्पेन्ड करण्यात आल्याचा स्क्रीनशॉट ट्विटरवर शेअर केलाय. यामध्ये प्रसादनं जे योग्य आहे ते बोलल्यानंतर हे तुम्हाला मिळतं असं म्हटलं आहे.
नेमकं प्रकरण काय? (White Line Controversy In Mumbai)
सोशल मीडियावर गेल्या आठवडारापासून युट्यूबर प्रसाद वेदपाठकने (Prasad vedpathak) उचलून धरलेला वादाचा मुद्दा चांगलाच गाजत असून घाटकोपरमधल्या (Mumbai) सोसायटीचा हा वाद आहे. सोशल मीडियावर या वादावरुन वेगवेगळ्या चर्चा रंगल्याचं पाहायला मिळतंय. आपण राहत असलेल्या सोसायटीतील घटनेवर प्रसादनं संताप व्यक्त करत तीव्र नाराजी व्यक्त केलीय, त्याच्या या भूमिकेची सोशल मीडियावर जोरदार चर्चा सुरू झाली होती. कारण, सोसायटीमधील जैन कुटुंबीयांनी सोसायटीत कुणालाही न विचारता पांढरी पट्टी मारली होती. या पांढऱ्या पट्टीला सोयायटीमधील इतर सदस्यांनीही विरोध दर्शवला होता. माध्यमांनीही हा मुद्दा उचलून धरला होता. अखेर, आता ह्या पांढऱ्या पट्टीवर रंगकाम करण्यात आलं असून स्वत: प्रसादने याची माहिती दिली आहे.
प्रसाद वेदपाठकच्या सोसायटीत काही जैन समाजातील लोकांनी पांढऱ्या रंगाची पट्टी मारल्याची माहिती समोर आली. त्यावर प्रसादने प्रश्न उपस्थित केला होता. तसेच, आपल्या सोसायटीच्या आवारात अशी पांढरी पट्टी मारण्यात आली, त्यावेळी सोसायटीतील सदस्यांची परवानगी कुणीच घेतलेली नाही, असा दावा त्याने केला आहे. प्रसादच्या माहितीनुसार, जैन धर्मगुरूंसाठी ही पट्टी आखण्यात आली आहे. धार्मिक मान्यता पाळायच्या असतील तर त्या घरी कराव्यात सार्वजनिक ठिकाणी असं प्रकारच्या कृत्यावर प्रसादनं आक्षेप नोंदवला होता. तसेच, हा धार्मिक तेढ निर्माण करण्याचा प्रयत्न आहे, त्यामळे ही पट्टी लवकरात लवकर हटवावी, अशी मागणीही त्याने केली होती. अखेर, प्रसादने ट्विटवरुन घटनेची माहिती देत, पांढऱ्या पट्ट्यांवर रंगकाम सुरू करण्यात आल्याचे सांगितले, त्याने फोटोही शेअर केला आहे. तसेच, माध्यमांनी दखल घेतल्याबद्दल सर्वांचे आभार व्यक्त केले.