पुणे: सुरुवातीलाच सावित्री हॉस्पिटलचे उद्घाटन झाले जाहीर करतो, हॉस्पिटलच्या माध्यमातून चांगली वैद्यकीय सेवा उपलब्ध करून दिली आहे. बारामती शहराची ओळख मेडिकल हब म्हणून होत आहे. पुण्यश्लोक होळकरांच्या नावाने आपण बारामती मेडिकल कॉलेज सुरू केलं. आता, आयुर्वेदिक महाविद्यालयाचे काम सुरू आहे. कॅन्सर हॉस्पिटल देखील आपण बारामतीत करत आहोत. महाराष्ट्रामध्ये बारामतीचे बस स्थानक उत्तम झालं आहे, तसेच वर्कशॉप देखील करत आहोत. बारामती (Baramati) हॉस्पिटलमध्ये कॅन्सर विभाग सुरू करण्याचा निर्णय घेतला आहे. लवकरच त्याला निधी देण्याचं काम होईल, आरोग्य खातं आपल्याकडेच आहे. मला 35 वर्षे बारामतीकरांनी सेवा करण्याची संधी दिली, चांगली आरोग्य सेवा देण्याचा माझा प्रयत्न आहे, असे म्हणत उपमुख्यमंत्री अजित पवारांनी (Ajit pawar) बारामतीकरांशी संवाद साधला. यावेळी, बेशिस्त वागणाऱ्यांना टायरात घालून मारा, असे निर्देशच पोलिसांना (Police) दिले.
बारामतीकरता, इंदापूरकरता, महाराष्ट्राकरिता ज्या ज्या गोष्टी करता येतील त्या गोष्टी महायुती सरकार करत आहे, असे म्हणत अजित पवारांनी बारामतीमधील हॉस्पिटल उद्घाटनाच्या कार्यक्रमातून आरोग्य सुविधांची आणि बारामतीमधील विकास कामांची माहिती दिली. यावेळी, बेशिस्तपणा खपवून घेतला जाणार नाही, म्हणत बारामतीकरांन चांगलाच इशाराही दिला.
काही काही जण चुका करत आहेत, रस्त्यावर कचरा टाकत आहेत. जनावरे चरायला सोडत आहेत मी त्यांना कृपा करून सांगतो आता ती जनावर कोंडवड्यात घातली तर ठीक, नाही ऐकलं तर त्यांना बाजार दाखवतो. आता जे मालक लोक आहेत त्यांना निर्वाणीचा इशारा देतो, ऐकलं तर ठीक नाही ऐकलं तर मालकांवर केसेस होतील, असे अजित पवार यांनी म्हटले. तसेच, ज्यांची गाढव आहेत, जनावर आहेत, ज्यांच्या गाई इकडे-तिकडे फिरत असतात. तुम्ही तुमच्या दारात बांधायचे ते बांधा, काय खायला प्यायला घालायचं ते घाला, बारामती जी चांगली करतो ती काय सगळ्यांना मोकळी फिरण्याकरता नाही, असेही अजित पवारांनी म्हटले.
बेशिस्त वागणाऱ्यांना दम
कधी कधी मोटरसायकलवाले इकडे तिकडे बघतात, हळूच ओव्हरटेक राँग साईडने जाण्याचा प्रयत्न करत आहेत. असा माणूस सापडला तर तो मुलगा किंवा व्यक्ती कितीही मोठ्या बापाची असली तरी त्याला टायरमध्ये घेऊन असा झोडायला सांगणार आहे की त्याला दहा पिढ्या आठवल्या पाहिजे. अजिबात नियम कोणीही तोडू नका, मग तो अजित पवार असो किंवा अजित पवाराचा कोणी नातेवाईक असेल. सर्वांना नियम सारखा आहे. मी जे करतो ते बारामतीकरांसाठी, सर्वांसाठी करतो, असे म्हणत बेशिस्त वाहन चालवणाऱ्यांना अजित पवारांनी फटकारले. मी अनेक ठिकाणी झाड लावली आहेत, तिथे कोणी पण येत आहे, जनावरं खात आहेत. पण, तसं चालणार नाही. जिथे माणसांना बसायला केलं आहे तिथे एकजण मोटरसायकल घालून निवांत मांडी घालून लोकांसोबत गप्पा मारतोय. गाडी वळवली आणि पोलिसांना सांगितले की, याची गाडी ताब्यात घे आणि याला चांगला टायरमध्ये घाल, मग तो म्हणतोय दादा चुकलं.
आई-वडिलांना विसरु नका
मी बारामतीला होतो तेव्हा पहिलं आईकडे जातो, कालच बारामतीला आलो आईकडे गेलो, दर्शन घेतले गप्पा मारल्या. प्रत्येकाने आईशी प्रेमाने आपलेपणाने वागावं. आपण समाजात आपल्या आई बापामुळे आहोत. जीवात जीव असेपर्यंत आई-बापाला विसरू नका. काही काही नवीन पिढी आई बापाकडे नीट बघत नाही, त्यांना सांगतो हे वागणं बरं नव्हं, असे म्हणत अजित पवारांनी आई-वडिलांच्या मुलांप्रतीच्या त्यागाबद्दल सांगितलं.
हेही वाचा
युनेस्कोच्या यादीत 12 किल्ले; मोदी सरकारचे कान टोचणाऱ्या राज ठाकरेंना मंत्री आशिष शेलारांचे उत्तर