Biggest Anty Naxal Opration In History : एका बाजूला जम्मू काश्मीरमध्ये दहशतवाद  (Naxal) विरोधातला सर्वात मोठं ऑपरेशन सध्या सुरू आहे. तर दुसऱ्या बाजूला छत्तीसगडच्या (Chhattisgarh)  बिजापूर जिल्ह्यात छत्तीसगड - तेलंगणाच्या सीमेवर नक्षलवाद विरोधातलं आजवरचं देशातलं सर्वात मोठं ऑपरेशन  (Naxal Encounter) राबवलं जात आहे. करेगुट्टाच्या डोंगराळ भागात सीआरपीएफ, छत्तीसगड पोलीसांचे STF आणि DRG तसेच तेलंगाना पोलिसांच्या ग्रे हाऊंड्स तुकड्यांतील एकूण 7 हजार पेक्षा जास्त जवानांनी 500 पेक्षा जास्त नक्षलवाद्यांना गेले सहा दिवस घेरून ठेवले आहे.

एबीपी माझाला मिळालेल्या एक्सक्लुझिव्ह माहितीप्रमाणे, या ठिकाणी सर्वात जास्त धोकादायक मानला जाणारा आणि सहा कोटी रुपयांचे बक्षीस असलेला नक्षल कमांडर 'माडवी हिडमा' नक्षलवाद्यांच्या बटालियन 1 सह घेरला गेला आहे. त्याच्यासोबत बटालियन 1 चा कमांडर 'देवा बरसे सुक्का' आणि नक्षलवाद्यांसाठी शस्त्रांसह सर्व आवश्यक वस्तूंची सप्लाय चेन सतत कायम ठेवणारा 'दामोदर' ही सुरक्षा दलांच्या चक्रव्यूहात अडकला आहे. त्यामुळे नक्षलवाद्यांच्या विरोधातल्या देशातील आजवरच्या सर्वात मोठ्या ऑपरेशनमध्ये सुरक्षा दल यशस्वी ठरले, तर नक्षलवादावर हा देशातील सर्वात मोठा आघात ठरणार आहे. 

जिथे ऑपरेशन, तो भाग भौगोलिक दृष्ट्या कसा?

-छत्तीसगडमधील बिजापूर जिल्ह्याच्या दक्षिणे टोकावर 'करेगुट्टा' डोंगर छत्तीसगड व तेलंगणाच्या सीमेवर आहे.

- करेगुट्टा डोंगर आणि तिथला घनदाट जंगल तब्बल 145 वर्ग किलोमीटर परिसरात पसरलेला आहे.

- डोंगराचा 70 टक्के छत्तीसगडमध्ये तर 30 टक्के भाग तेलंगणात येतो.

- उभ्या उंचीच्या या डोंगरावर खालून चढून जाणं आणि उंचावर सुरक्षित ठिकाणी बसलेल्या नक्षलवाद्यांविरोधात ऑपरेशन राबवण सुरक्षा दलांसाठी सोपं नाही.

-तीव्र उन्हामुळे या ठिकाणी हजारोंच्या संख्येने सुरक्षा दल असतानाही मोठ्या संख्येने जवान रोज डिहाइड्रेट होत आहे.

-अनेक किलोमीटर पर्यंत निर्मनुष्य असलेल्या या भागात हेलिकॉप्टरच्या मदतीने 7000 पेक्षा जास्त जवानांसाठी रोज रेशन, पाणी व औषधी पोहोचवल्या जात आहेत.

- नक्षलवाद्यांनी डोंगराच्या चारही बाजूंना तसेच डोंगर वर येणाऱ्या मार्गावर मोठ्या संख्येने भूसुरुंग पेरून सुरक्षा दलांची वाट विकट केली आहे..

- मात्र असे असले तरी सुरक्षा दल या ठिकाणी नक्षलवादाविरोधातल्या निर्णायक लढ्याच्या इच्छेने गेले सहा दिवस खम ठोकून उभे आहेत.

करेगुट्टाच्या डोंगरावर सुरक्षा दलांनी कोणा-कोणाला घेरलं?

माडवी हिडमा :

देशाच्या नक्षल इतिहासात सर्वात जास्त क्रूर आणि धोकादायक नक्षल कमांडर मानला जाणारा माडवी हिडमा या ठिकाणी घेरला गेल्याची माहिती आहे.

अनेक वर्ष नक्षलवाद यांच्या सर्वात घातक मानल्या जाणाऱ्या बटालियन 1 चा नेतृत्व माडवी हिडमा ने केलाय आणि सुरक्षा दलाना सर्वाधिक नुकसान पोहोचवले आहे.

6 एप्रिल 2010 रोजी देशातील सर्वात मोठ्या नक्षलवादी हल्ल्यात माडवी हिडमाच्या नेतृत्वात नक्षलवाद्यांचे बटालियन 1 ने सीआरपीएफच्या 76 जवानांना मारले होते.

2013 मध्ये सुकमा मधील झिरम घाटी मध्ये काँग्रेस नेत्यांच्या ताफ्यावर माडवी हिडमाच्या नेतृत्वातच हल्ला झाला होता. त्यात 31 काँग्रेस नेत्यांचा दुर्दैवी मृत्यू झाला होता.

2017 मध्ये भेज्जी या ठिकाणी सीआरपीएफच्या 12 जवानांचा मृत्यूसाठी हिडमा जबाबदार होता.

2017 मध्ये बुरकापाल या ठिकाणी 25 पोलिसांचा मृत्यू हिडमाच्या बटालियन 1च्या हल्ल्यात झाला होता.

4 एप्रिल 2021 रोजी टिकुलगुडा मध्ये हेडमाच्या नेतृत्वात नक्षलवाद्यांनी 23 सीआरपीएफ जवानांची हत्या केली होती.

हिडमा किती धोकादायक नक्षल कमांडर आहे याचा अंदाज छत्तीसगड, तेलंगणा, झारखंड आणि महाराष्ट्रात मिळून त्याच्यावर एकूण सहा कोटींचे बक्षीस आहेत.

देवा बरसे सुक्का :

गेल्या वर्षी हिडमाला पदोन्नती मिळून तो नक्षलवाद्यांच्या निर्णय प्रक्रियेतील अत्यंत महत्त्वाच्या सेंट्रल कमिटीचा सदस्य झाला.

त्याच्यानंतर "देवा बरसे सुक्का" हा बटालियन एक चा कारभार सांभाळतो आहे. हिडमाचे नेतृत्वात गेल्या काही वर्षात झालेल्या प्रत्येक हल्ल्यात देवाही त्याच्यासोबत होता.

तोच देवा करेगुट्टाच्या डोंगरावर हेडमासह सुरक्षा दलांच्या चक्रव्यूहात अडकला आहे.

दामोदर

अबुझमाड या नक्षलवाद्यांच्या बालेकिल्ल्यात नक्षलवाद्यांना सातत्याने शस्त्रसाठा मिळत रहावं, त्यांची रेशन, औषध, संगणक मोबाईल, अशी सप्लाई लाईन सतत कायम राहावी यासाठी काम करणारा दामोदर ही करेगुट्टाच्या डोंगरावर अडकल्याची माहिती आहे.

नक्षल्यांच्या मुळावर अखेरचा घाव?

करेगुट्टाच्या डोंगराच्या या ऑपरेशनमध्ये सुरक्षा दलांना अद्याप फारसं यश मिळालं नसलं, तरी या ठिकाणी सुरक्षा दलाने 500 पेक्षा जास्त नक्षलवाद्यांसह त्यांच्या सर्व मोठ्या कमांडर्सला घेरले आहे. या घेराबंदीचा काय महत्व आहे हे ओळखूनच सुरक्षा दल गेले पाच दिवस 44 - 45 अंश सेल्सिअस तापमानामध्ये सातत्याने धैर्य ठेवून करेगुट्टाच्या डोंगराला घेरा घालून थांबले आहे. अधून-मधून गोळीबार सुरू आहे. जर या ऑपरेशनच्या माध्यमातून सुरक्षा दल हिडमा आणि देवाला नामोहरम करण्यात किंवा अटक करण्यात यशस्वी ठरले, तर फक्त छत्तीसगडच नाही तर भारतातील नक्षलवादावर सुरक्षा दलांचे हे आजवरचा सर्वात मोठा आघात मानला जाईल.

इतर महत्वाच्या बातम्या