Hardik Pandya Jasmin Walia: टीम इंडियाचा अष्टपैलू खेळाडू हार्दिक पांड्या आणि नताशा स्टॅनकोविकने यांनी एकमेकांपासून विभक्त होण्याचा निर्णय घेतला. 18 जुलै रोजी सोशल मीडियावर पोस्ट करत हार्दिक पांड्या आणि नताशा स्टॅनकोविकने घटस्फोट घेत असल्याची माहिती दिली.मात्र दोघांनी अचानक विभक्त होण्याचा निर्णय का घेतला, याबाबत अधिकृत कोणतीच माहिती समोर आलेली नाही. मात्र याचदरम्यान हार्दिक पांड्या पुन्हा प्रेमात पडल्याची चर्चा सुरु झाली आहे.
हार्दिक पांड्या (Hardik Pandya) आणि ब्रिटीश गायिका जास्मिन वालिया (Jasmin Walia) एकमेकांना डेट करत असल्याच्या चर्चांना उधाण आले आहे. हार्दिक आणि जास्मिन दोघेही ग्रीसमध्ये एकत्र सुट्टी घालवल्याची चर्चा रंगली आहे. हार्दिक पांड्या आणि जास्मिन वालिया यांच्या समोर आलेल्या फोटोनंतर नताशा स्टॅनकोविकची (Natasha Stankovic) पोस्ट सध्या व्हायरल होत आहे.
नताशा पोस्टद्वारे काय म्हणाली?
नताशाने तिच्या इन्स्टाग्राम अकाउंटवर हा व्हिडीओ शेअर केला आहे. यामध्ये देवावर विश्वास व्यक्त करत सर्व काही ठीक होईल, असं नताशाने म्हटलं आहे. योग्य वेळ आल्यावर देव सर्व काही ठीक करेल...जर आपण असे केले तर देवाला सर्वकाही सुरळीत करण्याची संधी मिळेल आणि यानंतर आपण वेगाने पुढे जाऊ, असं नताश पोस्टद्वारे म्हणाली.
दोघांच्या फोटोमुळे चर्चांना उधाण-
हार्दिक पांड्या आणि जास्मिन वालिया एकाच ठिकाणी आणि एकाच पूलमध्ये असल्याचं दिसतंय. हार्दिक पांड्याने एक फोटो पोस्ट केला होता. या फोटोमध्ये आजूबाजूचे दृश्य आणि जास्मिनने पोस्ट केलेल्या फोटोतील दृश्य एकच असल्याचं दिसून येत आहे. जस्मिनच्या या बिकिनी पोस्टवर हार्दिकने कोणतीही प्रतिक्रिया दिली नसली तरी, हार्दिकने जास्मिनचे अलीकडील सर्व फोटो लाईक केले आहेत. विशेष म्हणजे दोघेही एकमेकांना इन्स्टाग्रामवर फॉलो करतात, यामुळे दोघंही एकमेकांना डेट करत असल्याचा दावा सोशल मीडियावर करण्यात येत आहे.
कोण आहे जास्मिन वालिया?
जास्मिन वालिया ही एक ब्रिटिश गायिका आणि टीव्ही स्टार आहे, जिची चर्चा म्युझिक इंडस्ट्रीपासून ते सोशल मीडियापर्यंत सर्वत्र होते. लंडनमधील एसेक्समध्ये जन्मलेल्या जास्मिनचे आई-वडील भारतीय वंशाचे आहेत. 'द ओनली वे इज एसेक्स' या ब्रिटीश रियॅलिटी टीव्ही मालिकेचा भाग बनल्यानंतर जास्मिनने पहिल्यांदा जगाचे लक्ष वेधून घेतले होते. जास्मिननने पहिल्यांदाच जॅक नाईटसोबत परफॉर्म केले आणि 2018 मध्ये 'सोनू के टीटू की स्वीटी' या बॉलिवूड चित्रपटासाठी 'बम डिगी डिगी बम' या गाण्याचा रिमेक करण्यात आला, तेव्हा तिची लोकप्रियता अधिकच वाढली. जास्मिन सोशल मीडियावर खूप अॅक्टिव्ह असून इन्स्टाग्रामवर तिचे 6.4 लाख फॉलोअर्स आहेत. युट्यूबवर जास्मिनला 5.7 लाख लोकांनी सबस्क्राईब केले आहे.