Pankaja Munde : नाशिक लोकसभा मतदारसंघासाठी महायुतीत (Mahayuti) अजूनही उमेदवार ठरलेला नाही. त्यातच बीड लोकसभा मतदारसंघाच्या भाजपच्या उमेदवार पंकजा मुंडे (Pankaja Munde) यांनी नाशिकच्या जागेवर प्रीतम मुंडेंना (Pritam Munde) उभे करेल, असे म्हटले होते. यावरून महायुतीत मोठी खळबळ उडाली होती. आता पंकजा मुंडे यांनी आपले वक्तव्य मागे घेतले आहे.
नाशिक लोकसभा मतदारसंघात महायुतीत जोरदार रस्सीखेच सुरु आहे. दररोज नवनवीन उमेदवारांची नावे समोर येत आहेत. हेमंत गोडसे (Hemant Godse), छगन भुजबळ (Chhagan Bhujbal), अजय बोरस्ते (Ajay Boraste), राहुल ढिकले (Rahul Dhikale) यांच्या नावानंतर प्रीतम मुंडे यांचे नाव अचानक चर्चेत आले. यावरून राष्ट्रवादी अजित पवार गटाचे मंत्री छगन भुजबळ यांनी पंकजा मुंडे यांना टोलाही लगावला होता.
काही नासमझ लोकांनी वेगळा अर्थ काढला : पंकजा मुंडे
पंकजा मुंडे (Pankaja Munde) यांनी आपला उमेदवारी अर्ज दाखल केल्यानंतर बीडमध्ये (Beed Lok Sabha Consituency) जाहीर सभा घेतली होती आणि या सभेमध्ये बोलत असताना त्यांनी प्रीतम मुंडे (Pritam Munde) यांना मी नाशिकमधून उभा करेल असं म्हटलं होतं. मात्र प्रीतम मुंडे यांना नाशिक मधून उभा करणार हे मी सहज बोलून गेले. काही नासमझ लोकांनी याचा वेगळा अर्थ काढला. नाशिक हे प्रीतम मुंडे यांचे सासर आहे. त्यांना सासरला पाठवता येईल, अशा आशयाने मी बोलेले. मात्र काही लोकांचे स्वागताचे मेसेज देखील आले, असे स्पष्टीकरण पंकजा मुंडे यांनी दिले आहे.
काय म्हणाले होते छगन भुजबळ?
पंकजा मुंडेंच्या वक्तव्यावर छगन भुजबळ म्हणाले होते की, पंकजा मुंडे यांनी आपल्या निवडणुकीत लक्ष द्यावे. आमच्याकडे अनेक उमेदवार आहेत. नाशिकमध्ये तिन्ही पक्षात खूप उमेदवार आहेत, त्यामुळे त्यांनी बीडमध्ये लक्ष द्यावे, असा टोला त्यांनी लगावला होता. यामुळे नाशिक लोकसभा मतदारसंघावरून महायुतीच्या दोन ओबीसी नेत्यांमध्ये जुंपल्याचे दिसून आले होते. आता पंकजा मुंडे यांचे वक्तव्य छगन भुजबळांना प्रत्युत्तर आहे का? अशी चर्चा सध्या राजकीय वर्तुळात रंगली आहे.
इतर महत्वाच्या बातम्या