कल्याण : ट्रिपल सीट जाणाऱ्या तरुणाला वाहतूक पोलिसाने अडवल्यानंतर तरुणाने पोलिसाला मारहाण केल्याची घटना उल्हासनगरमध्ये घडली आहे. याप्रकरणी विठ्ठलवाडी पोलिसांनी या तरुणाला बेड्या ठोकल्या आहेत.
रावसाहेब काटकर असं मारहाण झालेल्या वाहतूक पोलिसाचं नाव आहे. रावसाहेब हे काल उल्हासनगरच्या ओटी सेक्शन भागात कर्तव्य बजावत होते. यावेळी दुचाकीवरून भरधाव वेगात ट्रिपल सीट आलेल्या आप्पा मुंडे याला त्यांनी थांबवण्याचा प्रयत्न केला.
मात्र आप्पा मुंडे याने त्यांना धक्का देत पुढे जाण्याचा प्रयत्न केला. यानंतर गाडी थांबवून काटकर यांना मारहाणसुद्धा केली. हा प्रकार काटकर यांच्यासोबत असलेल्या ट्रॅफिक वॉर्डनने मोबाईलमध्ये चित्रित केला.
याप्रकरणी विठ्ठलवाडी पोलीस ठाण्यात आप्पा मुंडे याच्यावर गुन्हा दाखल करण्यात आला असून त्याला अटक करण्यात आली आहे.