1 मे पासूनच्या लसीकरणाबाबतच्या शंकांचे निरसन करा, भाजपचे मुख्य प्रवक्ते केशव उपाध्ये यांची मागणी
येत्या 1 मे पासून लसीकरणासाठी होणारी अधिकची गर्दी ध्यानात घेऊन राज्य सरकारने जी लसीकरणासाठीची जास्तीची केंद्रे निश्चित केली आहेत, त्यांची यादी जाहीर करावी, अशी मागणी भाजपच्या केशव उपाध्ये यांनी केली.
मुंबई : देशभरात 1 मे पासून तिसऱ्या टप्प्यातील कोरोना लसीकरण मोहिमेला सुरुवात होत आहे. तिसऱ्या टप्प्यात 18 वर्षांवरील सर्वांचं लसीकरण केलं जाणार आहे. राज्यात 1 मे पासून सुरु होणाऱ्या लसीकरणाबाबत जनतेच्या मनात असलेल्या शंकांचे राज्य सरकारने निरसन करावे, अशी मागणी भाजप प्रदेश मुख्य प्रवक्ते केशव उपाध्ये यांनी केली आहे.
भाजप प्रदेश कार्यालयात झालेल्या पत्रकार परिषदेत ते बोलत होते. उपाध्ये म्हणाले की, लसीकरणासाठी तरुणांमध्ये उत्साह आहे. 1 मे नंतर लसीकरणासाठी मोठ्या संख्येने नागरिक घराबाहेर पडतील, अशी अपेक्षा आहे. सध्याचे लसीकरण आणि 1 मेपासून होणारे 18 ते 45 वयोगटातील नागरिकांचे लसीकरण पाहता प्रत्येक महानगरपालिका क्षेत्र व जिल्ह्यानुसार लसीकरण केंद्रांची आकडेवारी जाहीर करावी.
ट्रेंडिंग
कोरोनाची लक्षण असतानाही निगेटिव्ह रिपोर्ट का येतो? असे झाल्यास काय करावे?
येत्या 1 मे पासून लसीकरणासाठी होणारी अधिकची गर्दी ध्यानात घेऊन राज्य सरकारने जी लसीकरणासाठीची जास्तीची केंद्रे निश्चित केली आहेत, त्यांची यादी जाहीर करावी. 1 मे नंतर होणाऱ्या लसीकरणासाठी आयत्या वेळी येणाऱ्या नागरिकांना वॉक इनसाठी परवानगी असेल का? की केवळ आधी ऑनलाईन नोंदणी केली असेल त्यांचंच लसीकरण केले जाईल, याबाबतही राज्य सरकारने खुलासा करणे आवश्यक आहे, असा केशव उपाध्ये यांनी म्हटलं.
लसीकरण मोफत की सशुल्क?
तसेच लसीकरण मोफत आहे की सशुल्क आहे याबाबत आघाडी सरकारमध्ये एकवाक्यता नसल्याचे काही मंत्र्यांच्या वक्तव्यावरून दिसत आहे. त्यामुळे लसीकरण मोफत आहे की नाही याचाही खुलासा राज्य सरकारने करावा, असंही केशव उपाध्ये यांनी सांगितले.
1 मे पासून सुरु होणाऱ्या लसीकरणासाठी 28 एप्रिलपासून नोंदणी सुरू
देशात 16 जानेवारीपासून जाहीर करण्यात आलेल्या लसीकरण मोहिमेच्या तिसऱ्या टप्प्याला 1 मे पासून सुरुवात होत आहे. यामध्ये 18 वर्षांवरील सर्वांचं लसीकरण केलं जाणार आहे. या लसीकरण मोहिमेची नोंदणी 28 एप्रिलपासून सुरू होणार आहे. केंद्र सरकारने याबाबत माहिती दिली आहे. नोंदणी अधिकृत वेबसाइट COWIN.GOV.IN वर होईल. 18 वर्षांवरील सर्वांचं लसीकरण 1 मे पासून सुरु होईल.