मुंबई : गोरेगावमधील एका मेट्रो स्थानकावर धक्कादायक घटना घडली असून पालकांचं लक्ष नसल्यामुळे दोन वर्षांचा मुलगा मेट्रोमधून अचानक बाहेर आला आणि तिथेच थांबला. मात्र मेट्रो स्थानकावरील तैनात कर्मचाऱ्यामुळे मोठा अनर्थ टळला. या कर्मचाऱ्यानं तात्काळ मेट्रो चालकाला ट्रेन सुरू करू नको असं सांगितलं. त्यानंतर मेट्रोचं दार उघडलं आणि मुलगा पुन्हा सुखरुप आत गेला.
Bangur Nagar Metro Station : दरवाजे बंद, मात्र मुलगा बाहेरच राहिला
मुंबई मेट्रोच्या बांगुर नगर मेट्रो स्टेशनवर (Bangur Nagar Station) ही धक्कादायक घटना घडली. दोन वर्षाचा मुलगा मेट्रोत चढताना बाहेर दरवाजाबाहेरच थांबला. त्याचे पालक मात्र मेट्रोमध्ये गेले. त्यांचे लक्ष नसल्याने तो मुलगा तसाच मेट्रोबाहेर थांबला. नंतर मेट्रोचे दरवाजे बंद झाल्याने तो मुलगा कावराबावरा झाला.
दरवाजे बंद झाले तरीही तो मुलगा दरवाजापाशी येऊन आत जाण्याचा प्रयत्न करू लागला. मेट्रो सुरू होणार इतक्यात एका कर्मचाऱ्याने ते पाहिलं आणि त्याने ड्रायव्हरला मेट्रो सुरू न करण्याच्या सूचना दिल्या. नंतर तत्परतेने तो कर्मचारी त्या मुलाकडे धावत गेला.
कर्मचाऱ्याच्या सतर्कतेमुळे मुलाचा जीव वाचला
एवढं सगळं घडल्यानंतर त्या मेट्रोचे दरवाजे पुन्हा उघडले आणि तो मुलगा आतमध्ये गेला. त्यामुळे त्या मुलाच्या पालकांच्या आणि ते दृश्य पाहणाऱ्या सगळ्यांच्याच जिवात जीव आला. संपूर्ण घटना बांगुर नगर मेट्रो स्टेशनवर असलेल्या सीसीटीव्ही कॅमेरामध्ये कैद झाली. या दोन वर्षांच्या मुलाचा जीव वाचवणाऱ्या कर्मचाऱ्याचे नाव संकेत चोडणकर (Sanket Chodankar) असं आहे.
मेट्रोमधून प्रवास करताना असो किंला रस्त्यावरून चालताना असो, लहान मुलांचा हात कधीही सोडता कामा नये. त्यांच्यात असलेल्या कुतूहलामुळे आणि समज नसल्यानं ते एकदम कुठेही जातात, ज्यामुळे त्यांच्या जीवाला धोका निर्माण होऊ शकतो.
ही बातमी वाचा: