Mumbai Local MegaBlock Updates : मुंबई : मुंबई लोकलच्या (Mumbai Local) तिनही मार्गांवर आज मेगाब्लॉक घेण्यात आला आहे. मध्य रेल्वेवर (Central Railway) माटुंगा-मुलुंड मार्गावर मेगाब्लॉक घेतला जाणार आहे. हार्बर मार्गावर (Harbour Railway) पनवेल-वाशी मार्गावर मेगाब्लॉक असणार आहे. तर, पश्चिम रेल्वेवरील चर्चगेट ते मुंबई सेंट्रल मार्गावर मेगाब्लॉक घेतला जाणार आहे. त्याचप्रमाणे, मध्य रेल्वेच्या पुणे-लोणावळा मार्गादरम्यान अभियांत्रिकी आणि दुरुस्तीच्या तांत्रिक कामांसाठी मेगाब्लॉक घेतला जाणार आहे. त्यामुळे अनेक रेल्वे गाड्या रद्द करण्यात आल्या आहेत.
मध्य रेल्वेवर माटुंगा-मुलुंड अप-डाऊन मार्गावर मेगाब्लॉक
मध्य रेल्वे मार्गावर माटुंगा-मुलुंड अप आणि डाऊन जलद मार्गावर सकाळी 11 वाजून 5 मिनिटं ते दुपारी 3 वाजून 55 मिनिटांनी ब्लॉक असणार आहे. त्यामुळे सीएसएमटी येथून सुटणाऱ्या जलद मार्गावरील लोकल माटुंगा आणि मुलुंड स्थानकांदरम्यान डाऊन धीम्या मार्गावर वळवण्यात येतील. तर ठाणे येथून सुटणाऱ्या अप जलद मार्गावरील लोकल मुलुंड आणि माटुंगादरम्यान अप धीम्या मार्गावर वळवण्यात येणार आहेत. त्यामुळे धीम्या मार्गावरील वाहतूक विस्कळीत होणार असल्याने प्रवाशांची मोठी गैरसोय होणार आहे.
हार्बर मार्गावर पनवेल-वाशी दरम्यान मेगाब्लॉक
हार्बर मार्गावर पनवेल-वाशी अप आणि डाऊन हार्बर मार्गावर सकाळी 11.05 ते दुपारी 4.05 वाजेपर्यंत ब्लॉक असणार आहे. त्यामुळे पनवेल येथून सीएसएमटीकडे जाणाऱया अप हार्बर मार्गावरील लोकल आणि सीएसएमटी येथून पनवेल, बेलापूरकडे जाणाऱया लोकल रद्द असणार आहेत.
पश्चिम मार्गावर चर्चगेट ते मुंबई सेंट्रल दरम्यान मेगाब्लॉक
पश्चिम रेल्वे मार्गावर चर्चगेट ते मुंबई सेंट्रल अप-डाऊन धीम्या मार्गावर सकाळी 10.35 ते दुपारी 3.35 वाजेपर्यंत ब्लॉक असणार आहे. त्यामुळे अप-डाऊन धीम्या मार्गावरील लोकल सेवा चर्चगेट ते मुंबई सेंट्रल स्थानकांदरम्यान जलद मार्गावर वळविण्यात येणार आहेत. तसेच अनेक लोकल रद्द केल्या जाणार आहेत
दरम्यान, मुंबई लोकल मार्गांवरील आजचा मेगाब्लॉक पायाभूत सुविधांच्या देखभाल आणि सुरक्षिततेसाठी आवश्यक आहेत. प्रवाशांनी रेल्वे प्रशासनाला सहकार्य करण्याचं आवाहन रेल्वेकडून करण्यात आलं आहे. रेल्वे रूळ, ओव्हरहेड वायर, सिग्नल यंत्रणेची देखभाल दुरुस्ती, या कामांसाठी आज ट्रान्स हार्बरवर मेगाब्लॉक घेतला जाणार आहे. त्यामुळे प्रवाशांना प्रवास करताना होणाऱ्या अडथळ्यांमुळे आणि गैरसोयीबद्दल रेल्वे प्रशासन दिलगीरी व्यक्त केली आहे.