मुंबई : घाटकोपरमधील इमारत दुर्घटनेचं सीसीटीव्ही फुटेज एबीपी माझाच्या हाती लागलं आहे. या फूटेजमध्ये 17 जणांचा जीव घेणारा सुनील शितप अक्षरश: थोडक्यात बचावल्याचं दिसत आहे. इमारत कोसळण्याच्या काही क्षणांपूर्वीच सुनील शितप इमारतीच्या बाहेर पडला होता. शितप गाडीत बसून निघाला आणि पुढील काही क्षणांत संपूर्ण साईदर्शन इमारत कोसळली. सीसीटीव्ही फुटेजनुसार 10 वाजून 19 मिनिटांनी शितप आपल्या गाडीत बसून निघाला आणि 10 वाजून 24 मिनिटांनी इमारत कोसळली. घाटकोपरच्या दामोदर पार्क इथली 30 वर्ष जुनी साईदर्शन इमारत 25 जुलै रोजी कोसळली. यात 17 जणांना जीव गमवावा लागला. मृतांमध्ये तीन महिन्यांच्या चिमुकलीचाही समावेश आहे. या इमारतीच्या तळमजल्यावर सुनील शितपचं नर्सिंग होम होतं. तिथे नुतनीकरणाचं काम सुरु होतं. परंतु रुग्णालयाचं नुतीनकरण करताना इमारतीच्या मूळ रचनेलाच धक्का लावण्यात आला होता. यावेळी पिलर तोडून लोखंडी रॉडने आधार दिला होता. तसंच इमारतीच्या कॉलमलाही धक्का लावल्याने इमारत कोसळल्याचा आरोप रहिवाशांचा आहे. पोलिसांनी याप्रकरणी आरोपी सुनील शितपला अटक केली आहे. आरोपी सुनील शितपने इमारतीचे पिलर हटवल्यामुळे 17 जणांचे जीव गेले. त्यामुळे सुनील शितपविरोधात भारतीय दंडविधान कलम 304 (2) (सदोष मनुष्यवधाचा गुन्हा), 336, 338, 283/17 अंतर्गत गुन्हा दाखल केला आहे. संबंधित बातम्या

संबंधित बातम्या :

घाटकोपर इमारत दुर्घटनेतील मृतांच्या नातेवाईकांना पंतप्रधानांची मदत घाटकोपरमध्येच सुनिल शितपची आणखी 4 अनधिकृत बांधकामं पेपरवाला ते कोट्यधीश, सुनिल शितपचा ‘सिनेमॅटिक’ प्रवास घाटकोपर इमारत दुर्घटना: शितपनं पिलरच हटवले, रहिवाशांचा आरोप मुंबईतील घाटकोपरमध्ये इमारत कोसळली इमारत दुर्घटना : पत्नी आयसीयूत, चिमुरडी गमावली, आईचा पत्ता नाही घाटकोपर इमारत दुर्घटना : शिवसेनेच्या सुनील शितपला अटक ढिगाऱ्याखाली 15 तास मृत्यूशी झुंज, राजेश दोशी सुखरुप