सिव्हिल हॉस्पिटल वैद्यकीय शिक्षणाकडे ट्रान्सफर केलं असं सांगतात, आता आम्हाला पण कुठेतरी ट्रान्सफर करा म्हणजे झालं, असं एकनाथ खडसे म्हणाले.
गिरीश महाजन यांना टोला
आरोग्य सेवा द्यायची नसेल तर हॉस्पिटलला कुलूप ठोका. समारंभपूर्वक बंद करण्याचा कार्यक्रम करु. नुसती लाखांची आरोग्य शिबिरं घायची आणि उपचारासाठी या मुंबईला असं करुन चालत नाही, असं म्हणत एकनाथ खडसे यांचा वैद्यकीय शिक्षणमंत्री गिरीश महाजन यांना टोला मारला. काही दिवसांपूर्वी गिरीश महाजन यांनी विक्रमी आरोग्य शिबीर घेतलं होतं. मला सरकारकडून आजच्या आज उत्तर हवं, अशी मागणी एकनाथ खडसेंनी केली.
जिल्हा ग्रामीण रुग्णालयात डॉक्टर उपलब्ध नसल्याने जनता त्रस्त आहे. MBBS नसतील, तर BAMS चे डॉक्टर्स द्या, अशी मागणी खडसेंनी केली. नातेवाईक जेव्हा एखाद्याचा मृतदेह आमदारांच्या दारावर आणून ठेवतात, तेव्हा आम्ही काय करायचं? असा प्रश्न खडसेंनी उपस्थित केला.
आरोग्य मंत्र्यांशी फोनवर चर्चा केली, तर डॉक्टर पाठवतो म्हणतात, त्याला लागतात चार तास. तोपर्यंत 10 जणांचे 100 होतात. हातात दगड घेऊन असतात, आम्ही काय करायचं? असा प्रश्नही खडसेंनी विचारला. डॉक्टर नाहीत, टेक्निशियन नाही, मग नर्सेसला पगार कशाला द्यायचा? असा सवाल खडसेंनी विचारला. जळगाव मेडिकल कॉलेजला एक रुपयाची तरतूद नाही. गेल्या चार दिवसात झालेले दोन मृत्यू डॉक्टरांच्या अभावी झाल्याचा दावाही खडसेंनी केला.