Dombivli Fire | डोंबिवलीतली आग दुसऱ्या दिवशीही धुमसतीच, परिसरात धुराचं साम्राज्य

डोंबिवली एमआयडीसीमधल्या केमिकल कंपनीला लागलेली आग दुसऱ्या दिवशीही धुमसतीच आहे. काल दुपारी बाराच्या सुमारास लागलेल्या आगीवर अग्निशमन दलाकडून नियंत्रण मिळवण्याचे शर्थीचे प्रयत्न सुरु आहेत. आगीमुळे या परिसरात धुराचं साम्राज्य पसरलं आहे.

डोंबिवली : डोंबिवली एमआयडीसीमध्ये काल (18 फेब्रुवारी) लागलेली आग अजूनही धुमसतीच आहे. संपूर्ण परिसरात धुराचं साम्राज्य पसरल्यामुळे नागरिक त्रस्त आहेत.  या आगीमुळे घाबरलेल्या काही स्थानिकांनी आपला मुक्काम दुसरीकडे हलवला आहे. डोंबिवली एमआयडीसीमधील मेट्रोपॉलिटन एक्सिकेम कंपनीला काल दुपारी बाराच्या सुमारास आग लागली होती. अद्यापही अग्निशमन दलाकडून आगीवर नियंत्रण मिळवण्याचे प्रयत्न सुरु आहेत.

मेट्रोपॉलिटन एक्सिकेम ही केमिकल कंपनी आहे. या कंपनीत शाई, प्लास्टिक, फार्मास्युटिकल्ससाठी लागणारं केमिकल्स बनवलं जातं. मंगळवारी दुपारी बाराच्या सुमारास आग लागली आणि बघता-बघता आगीने रौद्र रुप धारण केलं. या आगीमुळे एमआयडीसी परिसरात दुर्गंधी पसरली आहे. अग्निशमन दलासह एनडीआरएफची टीम देखील आग नियंत्रणात आणण्याचे प्रयत्न करत आहे. केमिकल कंपनी असल्यामुळे आग आटोक्यात आणण्यासाठी अडचणी येत आहेत.

आगीवर अद्यापही नियंत्रणात आलेली नाही. आगीचं नेमकं कारण समजू शकलेलं नाही. सुरुवातीला स्फोटाचे आवाज आले आणि त्यानंतर प्रचंड धूर हवेत पाहिल्याची माहिती प्रत्यक्षदर्शींनी दिली. सुदैवाने आगीत जीवितहानी झालेली नाही, परंतु मोठं आर्थिक नुकसान झालं आहे.