मुंबई : पाण्याचं बिल थकल्यास मुंबई महानगरपालिका सामन्य मुंबईकरांवर कडक कारवाई करते. अनेकदा पाणीही बंद केलं जातं. मात्र महापालिकेकडून मुख्यमंत्री आणि इतर नेतेमंडळींच्या वेगळा न्याय दिला जात असल्याचं दिसून आलं आहे. मुख्यमंत्र्यांसह इतर नेते मंडळींच्या शासकीय निवसस्थानांचं लाखो रुपयांचं पाणी बिल थकलं असल्याचं माहिती अधिकारातून उघड झालं आहे.

मुख्यमंत्र्यांच्या वर्षा बंगल्याचं 7 लाख 44 हजार 981 रुपयांची पाणी बिल थकलं आहे. मुख्यमंत्री व इतर मंत्र्यांच्या शासकीय निवासस्थानांचं एकूण 8 कोटी रुपये पाणी बिल थकलं आहे. त्यामुळे मुंबई महानगरपालिका मुख्यमंत्री व इतर मंत्र्यांच्या शासकीय निवासस्थानांवर एवढी मेहरबान का? असा प्रश्न उपस्थित केला जात आहे.

मुख्यमंत्री देवेंद्र फडणवीसच्या बंगल्याला मुंबई महानगरपालिकेनं डिफॉलटर घोषित केलं आहे. आरटीआय कार्यकर्ते शकील अहमद शेख यांनी मुंबई महानगरपालिकेकडून पाण्याच्या थकबाकीदारांची माहिती मागावली होती. त्यात ही माहिती उजेडात आली आहे.

मंत्र्यांच्या निवासस्थानांची पाणी बिल थकबाकी

देवेंद्र फडणवीस, मुख्यमंत्री, वर्षा निवासस्थान
एकूण थकबाकी - 7 लाख 44 हजार 981 रुपये

सुधीर मुनगंटीवार, वित्तमंत्री, देवगिरी निवासस्थान
एकूण थकबाकी -1 लाख 45 हजार 055 रुपये

विनोद तावडे, शालेय शिक्षणमंत्री, सेवासदन निवासस्थान
एकूण थकबाकी - 1 लाख 61 हजार 719 रुपये

पंकजा मुंडे, महिला व बालविकास मंत्री, रॉयलस्टोन निवासस्थान
एकूण थकबाकी - 35 हजार 033 रुपये

दिवाकर रावते, परिवहन मंत्री, मेघदूत निवासस्थान
एकूण थकबाकी - 1लाख 05हजार 484 रुपये

सुभाष देसाई, उद्योगमंत्री, पुरातन निवासस्थान
एकूण थकबाकी - 2 लाख 49 हजार 243 रुपये

एकनाथ शिंदे, सार्वजनिक बांधकाम, नंदनवन
एकूण थकबाकी - 2 लाख 28 हजार 424 रुपये

चंद्रशेखर बावनकुळे, ऊर्जामंत्री, जेतवन
एकूण थकबाकी - 6 लाख 14 हजार 854 रुपये

महादेव जानकर, पशुसंवर्धन मंत्री, मुक्तागिरी
एकूण थकबाकी - 1 लाख 73 हजार 497 रुपये

ज्ञानेश्वरी निवासस्थान
एकूण थकबाकी - 59 रुपये 778 रुपये

सह्याद्री अतिथीगृह
एकूण थकबाकी -12 लाख 04 हजार 390 रुपये