मुंबई : मनसे अध्यक्ष राज ठाकरे आणि विरोधी पक्षनेते देवेंद्र फडणवीस यांची दोन दिवसांपूर्वी भेट झाली होती. त्यानंतर राज्यात नवी राजकीय समीरकरण तयार होत असल्याच्या चर्चांना उधाण आलं होतं. या भेटीबाबत देवेंद्र फडणवीस यांनी प्रतिक्रिया दिली आहे. मनसे आणि भाजपची सध्या तरी युती शक्य नाही, असं देवेंद्र फडणवीस यांनी म्हटलं आहे.
राज ठाकरे यांच्याशी भेटीबाबत विचारलं असता देवेंद्र फडणवीस यांनी म्हटलं की, आमची अनेकदा भेट झाली आहे. तर मनसेला सोबत घेण्याबाबत बोलताना, सध्यातरी मनसेसोबत युतीची शक्यता नाही. मनसे आणि भाजपच्या विचारात आणि कार्यपद्धतीत अंतर आहे. मनसेने भूमिका आणि कार्यपद्धती बदलली तर युतीबाबत चर्चा होईल, असं देवेंद्र फडणवीस यांनी सांगितलं.
राज ठाकरे आणि देवेंद्र फडणवीस यांच्यात मंगळवारी प्रभादेवी परिसरातील हॉटेल इंडिया बुल्स स्कायमध्ये गुप्त बैठक झाल्याची माहिती आहे. या भेटीत दोन्ही नेत्यांमध्ये तासभर चर्चा झाल्याची माहिती आहे. या बैठकीबद्दल मोठी गुप्तता पाळण्यात आली होती. त्यानंतर मनसे भविष्यात भाजपसोबत जाऊ शकते. भविष्यात कोणत्याही पक्षासोबत राजकीय समीकरणे जुळू शकतात, असं मनसेचे नेते बाळा नांदगावकर यांनी एबीपी माझाशी बोलताना म्हटलं होतं. बाळा नांदगावकर यांच्या वक्तव्यानंतर भाजप-मनसे एकत्र येण्याच्या चर्चा सुरु झाल्या होत्या.
सततच्या अपयशामुळे मनसेच्या विचारधारेमध्ये फोकस नसल्याचे चित्र निर्माण झाले आहे. कधी मराठी माणसांसाठी, कधी हिंदूंसाठी, तर कधी सर्वांसाठीच मनसे धावून गेली. परंतु कोणताही एक समाज मनसेचा होऊ शकला नाही. त्यामुळे राजकीय समीकरणे जुळवण्यासाठी मनसे हिंदुत्वाची कास धरणार असल्याचे बोलले जात आहे.
VIDEO | भविष्यात मनसे भाजपसोबत देखील जाऊ शकते : बाळा नांदगावकर