मुंबई : मुंबईतील अंधेरी येथे रिक्षातून प्रवास करणाऱ्या महिलेसोबत अश्लील चाळे करत असताना महिलेने रिक्षातून उडी मारली. यात महिला जखमी झाली आहे. या महिलेने अंधेरी पोलिसात तक्रार दिल्यावर पोलिसांनी आरोपी रिक्षाचालक आणि त्याचा सहकाऱ्याला अटक केली आहे. अनिकेत जैस्वाल, सूरजकुमार राजभर अशी अटक केलेल्या दोघांची नावं आहेत. माहितीनुसार पीडित महिला गुंदवली सर्व्हिस रोड, पश्चिम द्रुतगती महामार्ग, अंधेरी येथून ऑटोरिक्षाने मालाडला जाण्यासाठी प्रवास करत होती. त्यावेळी रिक्षात मागे बसलेल्या रिक्षाचालकाचा मित्र असलेल्या व्यक्तिने पीडित महिलेची छेड काढण्यास सुरूवात केली.
त्यावेळी या महिलेने रिक्षा थांबवण्यास सांगितले असता रिक्षाचालक हा मागे बसलेल्या त्याच्या मित्राच्या सांगण्यावरून रिक्षा न थांबवता पुढे जाऊ लागला. त्यावेळी पीडित महिलेने धावत्या रिक्षामधून खाली उडी मारली. त्यामुळे त्यांच्या डोक्याला, हाताला दुखापत झाली. सदर घटनेबाबत या पीडित महिलेने अंधेरी पोलिस ठाण्यात तक्रार दिली. पोलिसांनी गुन्हा नोंद करून तपासादरम्यान फिर्यादी यांनी सांगितलेल्या वर्णनाप्रमाणे आरोपींचे रेखाचित्र काढण्यात आले. तसेच घटनास्थळी भेट देऊन उपलब्ध सीसीटीव्ही कॅमेरामधून संशयित ऑटोरिक्षाचे वर्णन व क्रमांक प्राप्त केले. तपास करुन या दोन्ही आरोपींना समतानगर पोलिस ठाणे हद्दीतून ताब्यात घेतले.
चौकशीमध्ये आरोपींनी गुन्ह्याची कबुली दिली. अनिकेत जैस्वाल, सूरजकुमार राजभर अशी अटक केलेल्या दोघांची नावं आहेत. यातील अनिकेत जैस्वाल याच्या विरोधात समता नगर पोलीस ठाण्यात या आधीही गुन्हे दाखल आहेत. तसेच यापूर्वी त्याने लहान मुलीवर अत्याचार सुद्धा केल्याचा गुन्हा दाखल आहे, अशी माहिती झोनचे डीसीपी महेश्वर रेड्डी यांनी दिली आहे.