नवी मुंबई : लग्न जुळवणाऱ्या (मॅट्रिमोनियल साईट) साईट्सवरुन 30 हून अधिक सुशिक्षित, नोकरदार तरुणींना जाळ्यात ओढून त्या तरुणींचं शारीरिक, आर्थिक आणि मानसिक शोषण करणाऱ्या आरोपीला रबाळे पोलिसांनी अटक केली आहे. सदर आरोपी स्वतः उच्च शिक्षित असून त्याची दोन लग्न देखील झाली आहेत.
सचिन पाटील ऊर्फ सचिन सांबरे असं या भामट्याचं नाव असून तो पालघर भागात विक्रमगड दहरेंजा या गावातील रहिवाशी आहे. लग्न जुळवणाऱ्या साईट्सवरुन 30 हून अधिक उच्चशिक्षित तरुणींना लग्नाचे अमिष दाखवून तसेच त्यांच्यासोबत प्रेमाचे नाटक करुन त्यांचे शारीरिक, आर्थिक आणि मानसिक शोषण केल्याचा धक्कादायक प्रकार उघडकीस आला आहे. सचिन पाटील ऊर्फ सचिन सांबरेला रबाळे पोलिसांनी बलात्कारासह, फसवणुकीच्या गुह्याखाली अटक केली आहे. सचिनने फसवलेल्या 16 तरुणींनी अतापर्यंत पोलीस ठाण्यात धाव घेतली असली तरी त्याच्या हातून फसल्या गेलेल्या तरुणींची संख्या मोठी असल्याची शक्यता व्यक्त करण्यात येत आहे.
आरोपी सचिन पाटील उर्फ सचिन सांबरे हा विवाहित असतानाही त्याने स्वत:ला कधी अविवाहित, तर कधी घटस्फोटित, तर कधी घटस्फोट घेण्याच्या मार्गावर असल्याची माहिती मॅट्रिमोनियल साईटवर दिली. असं करुन तो लग्नास इच्छुक असलेल्या सुशिक्षित, नोकरदार तरुणींना जाळ्यात ओढत होता. दिसायला देखणा असल्याचा फायदा उचलत सचिन पाटील याने तो रसायन शास्त्रामध्ये एम.एससी. आणि मार्केटिंग एमबीए, जपानी कंपनीत सेल्स मॅनेजरचे पद, पगार पाऊण लाख असल्याची माहिती लग्न जुळवणाऱ्या साईटवर टाकली होती. तसेच कधी अविवाहित तर कधी घटस्फोटित असल्याचे तो भासवीत असल्याने त्याच्या मोहजाळात लग्नाळू मुली सहज अडकत होत्या. त्यामुळे त्याने लग्नास इच्छुक असलेल्या तरुणींच्या विश्वासाचा, त्यांच्या भोळेपणाचा आणि वैयक्तिक वा घरगुती समस्यांचा गैरफायदा घेऊन त्यांचे शारीरीक, मानसिक व आर्थिक शोषण केले असल्याचे रबाले पोलीस ठाण्याचे सहाय्यक पोलीस निरीक्षक तुकाराम निंबाळकर यांनी सांगितले.
अशाच पद्धतीने त्याने वर्षभरापूर्वी नवी मुंबईत राहणाऱ्या एका वकील तरुणीला मॅट्रिमोनियल साईटवरुन आपल्या जाळ्यात ओढले होते. तिला आपली फसवणूक झाल्याचे कळले तेव्हा या तरुणीने पोलीस ठाण्यात धाव घेतली. यामुळे रबाळे पोलिसांनी सचिनने फसवलेल्या तरुणींना तक्रारीसाठी पुढे येण्याचे आवाहन केले आहे.