दुधाच्या नव्या दरांनुसार सध्याचा 24 रुपये लिटरनं असणारा गाईच्या दुधाचा दर आता 27 रुपयांपर्यंत वाढणार आहे. तर 33 रुपये लिटरनं म्हशीच्या दुधाचा असणारा दर आता 37 रुपयांपर्यंत वाढणार आहे.
येत्या तीन दिवसात दुधाचे नवे दर लागू होणार असून दूध संघांना हे नवे दर दूध उत्पादकांना देणं बंधनकारक असणार आहे.
“राज्य सरकारला शेतकऱ्यांची काळजी आहे. 13 तारखेला दुधाचे नवे दर घोषित करुन, शेतकऱ्यांना दिलासा देऊ. शेतकऱ्यांच्या पाठीमागे सरकार उभं राहील.”, असे राज्याचे दुग्धविकास मंत्री महादेव जानकर एबीपी माझाशी बोलताना म्हणाले.
“शेतकऱ्यांसाठी दुधाचे दर वाढवले असले, तरी सामान्य लोकांचाही सरकार विचार करत आहे. मध्यमवर्गीयांना त्रास होणार नाही, याची काळजी सरकार घेईल. मात्र, बळीराजाला आधार देण्याची आपण भूमिका घेतली पाहिजे.”, असेही जानकर यावेळी म्हणाले.