औंढा शहरापासूनच नजीकच असलेल्या गोकर्णाच्या माळावर आज सकाळी मजूर कामाला गेले होते. त्यांना दुर्गंधी जाणवत असल्याने आजूबाजूला पाहणी केली असता या प्रेमीयुगुलाचे मृतदेह झाडावर लटकलेले आढळले. यानंतर त्यांनी वन विभागाला कळविले. वनविभागाने हट्टा पोलिसांना या घटनेची माहिती दिली.
या दोघांनी एकाच ओढणीने दोन टोकांना गळफास घेतला. तर झाडाखाली विषाची रिकामी बाटलीही आढळली. यातील मुलीची ओळख पटली असून ती औंढा तालुक्यातील एका गावची आहे. ती मागच्या शनिवारी शाळेत जात असल्याचे सांगून घराबाहेर पडली होती. त्यानंतर ती घरी परतली नाही. औंढ्यात एका महाविद्यालयात ती बारावीत शिकत होती. वडिलांनी तिचा शोध घेवूनही ती सापडत नव्हती. आज तिचा मृतदेहच आढळून आला. मुलाची ओळख अद्याप पटलेली नाही. दोघांचेही प्रेत कुजलेल्या अवस्थेत असल्याने जागेवरच शवविच्छेदन केले जाणार आहे.