Shravan Somvar Vrat 2022 : आज श्रावणातील पहिला सोमवार; राज्यभरातील मंदिरात दर्शनासाठी भाविकांची गर्दी, वाचा अपडेट एका क्लिकवर

Shravan Somvar Vrat 2022 : आज श्रावण (Shravan 2022) महिन्यातला पहिला सोमवार.. यामुळे भाविकांनी राज्यभरातील मंदिरांमध्ये पहाटेपासूनच गर्दी केलीय. राज्यभरातील अपडेट वाचा या लाईव्ह ब्लॉगमध्ये...

पार्श्वभूमी

Shravan Somvar Vrat 2022 : आनंदाचा, उल्हासाचा, भक्तीचा श्रावण महिना सुरु झाला आहे. आज श्रावण (Shravan 2022) महिन्यातला पहिलाच सोमवार आहे. श्रावणातले सोमवार हे विशेष महत्वाचे समजले जातात. श्रावणातल्या सोमवारी वेगवेगळ्या धान्यांनी महादेवाची पूजा करायची धार्मिक परंपरा आहे. पहिल्या सोमवारची शिवामूठ तांदूळ आहे. या संदर्भात ज्योतिर्भास्कर जयंत साळगांवकर यांनी दिलेली माहिती जाणून घेऊयात.श्रावणी सोमवार व्रत : श्रावणी सोमवार या संदर्भात ज्योतिर्भास्कर जयंत साळगांवकर यांनी दिलेल्या माहितीनुसार, लग्न झाल्यानंतर सलग पहिली पाच वर्ष महाराष्ट्रात स्त्रिया हे शिवास्त वाहण्याचे व्रत करतात. ह्या व्रतात श्रावणातील सर्व सोमवारी उपवास करावा. शिवलिंगाची पूजा करून त्यावर प्रत्येक सोमवारी क्रमाने तांदूळ, तीळ, मूग, जवस ह्यापैकी एकेका धान्याची एक मूठ वाहावी. म्हणजे पहिल्या श्रावणी सोमवारी तांदळाची एक मूठ, दुसऱ्या श्रावणी सोमवारी तिळाची एक मूठ असा हा क्रम असावा. ही मूठ वाहताना ‘नम: शिवाय शान्ताय पंचवक्त्राय शूलिने । शृकङ्गिभृङ्गि-महाकालणयुक्ताय शम्भवे ।। ‘ हा मंत्र म्हणावा. पाच वर्षांनंतर व्रताचे उद्यापन करावे. यथाविधी शिवलिंगाची पूजा करून ब्राह्मणांना तसेच आप्तेष्टांना यथाशक्ती भोजन, भेटवस्तू, दक्षिणा देऊन ह्या व्रताची समाप्ती करावी.अशी करावी पूजा : सोमवार व्रत पद्धत 2 : आणखी एका वेगळ्या प्रकारे सोमवार व्रत केले जाते. हे व्रत श्रावणाप्रमाणेच चैत्र, वैशाख, कार्तिक आणि मार्गशीर्ष ह्या महिन्यांमध्येही केले जाते. मात्र श्रावणातील सोमवारी केल्यास ते विशेष मानले जाते. पूजेआधी व्रताचा संकल्प करावा. नंतर शिवशंकरांचे ध्यान करावे. तत्पश्र्चात’ओम नम: शिवाय’ ह्या मंत्रोच्चारासह शिवशंकरांची तर ‘ओम नम: शिवाय:’ या मंत्रोच्चारासह पार्वतीमातेची यथोचित षोडशोपचारी पूजा करावी. ह्या दिवशी एकभुक्त राहावे. शक्य असल्यास घराजवळच्या एखाद्या उद्यानात थोडा वेळ जाऊन यावे. अशातऱ्हेने हे व्रत एकूण चौदा वर्षे करून मग त्याचे यथासांग उद्यापन करावे. श्रावणातील सर्व सोमवारी पूर्ण दिवस उपवास करावा. तो दुसऱ्या दिवशी भोजन करून सोडावा.

01/08/2022 15:39:01

Nagpur : पहिल्या श्रावण सोमवारनिमित्त भाविकांची मांदियाळी

नागपूरः पहिल्या श्रावण सोमवारनिमित्त नागपुरातील शिव मंदिरात भाविकांची गर्दी आहे. गेल्या दोन वर्षात कोरोनामुळे प्रार्थनास्थळांवरही निर्बंध असल्यामुळे भाविकांना मंदिरात दर्शन घेता आले नाही. मात्र यंदा कोरोनाची लाट ओसरल्याने महादेवाच्या दर्शनासाठी भाविकांमध्येही उत्साह आहे. शहरातील  महाल येथील कल्याणेश्वर मंदिर, फुटाळा येथील तेलंगखेडी शिवमंदिर, सुराबर्डी येथील शिवमंदिर आणि मानकापूर येथील प्राचीन शिवमंदिरात भाविकांनी सकाळपासून दर्शनासाठी रांगा लागल्या आहेत.

01/08/2022 15:33:14

बेळगाव : श्री कपिलेश्वर मंदिरात भाविकांची पहाटेपासूनच गर्दी

पहिल्या श्रावण सोमवार निमित्त बेळगावातील दक्षिण काशी म्हणून ओळखल्या जाणाऱ्या श्री कपिलेश्वर मंदिरात भाविकांनी पहाटे पासून गर्दी केली होती. पहाटे महादेवाला विधिवत रुद्राभिषेक करण्यात आला. त्यानंतर महाआरती करून भक्तांना मंदिरात दर्शनासाठी प्रवेश देण्यात आला. श्रावणी सोमवार निमित्त मंदिरात आकर्षक फुलांची सजावट करण्यात आली होती. दर्शनासाठी भाविकांच्या लांबच्या लांब रांगा लागल्या होत्या. मंदिर परिसरात पूजा साहित्य आणि अन्य दुकानं थाटण्यात आली. श्री कपिलेश्वर मंदिराचे पौराणिक महात्म्य असून काशी यात्रा करून आल्यावर श्री कपिलेश्वराचे दर्शन घेतल्यावर काशी यात्रेची पूर्तता होते असं मानले जातं. शेकडो वर्षापूर्वीचं हे मंदिर असून श्री कपिल ऋषींनी या मंदिराची स्थापना केली अशी अख्यायिका आहे. दिवसभर मंदिरात दर्शन घेण्यासाठी भक्तांनी गर्दी केली होती.

01/08/2022 11:11:44

औरंगाबाद : घृष्णेश्वर मंदिरात देशभरातून भाविक दाखल

बारा ज्योतिर्लिंगापैंकी एक घृष्णेश्वर मंदिरात देशभरातून भाविक दाखल झाले आहेत. श्रावणी महिना सुरू होताच मंदिरात भक्तांची गर्दी पाहायला मिळत आहे.

01/08/2022 10:39:05

वर्धा :पुरातन मंदिरात श्रावणी सोमवारी पूजा

वर्धा शहरातील महादेवपुरा परिसरात असलेल्या शंभर वर्षांपूर्वीच्या पुरातन महादेव मंदिरात कोरोना काळानंतर पहिल्या श्रावण सोमवारी पूजेसाठी भक्तांची गर्दी दिसून आली. महादेव मंदिर परिसरातील बारा शिवलिंगांच्या पूजेसाठी देखील आता परवानगी असल्यामुळे भक्तांमध्ये उत्साह दिसून आला. मागच्या वर्षी कोरोनामुळे भक्तांना मंदिरात गर्दी करण्याची परवानगी नव्हती. त्यामुळे भक्तांना घरीच पूजा करून समाधान मानावे लागले होते. मात्र यावर्षी थेट गाभाऱ्यात प्रवेश करून भक्तांना शिवलिंगावर बेलफुल वाहून पूजा करायला मिळाली आहे. त्यामुळे चिमुकल्यांपासून पासून वृद्धांपर्यंत मंदिरात गाभार्‍यात पूजेसाठी सकाळपासूनच भक्तांची लांबच लांब रांग दिसून आली.

 

01/08/2022 10:37:43

अहमदनगर : श्री क्षेत्र डोंगरगण येथील रामेश्वर महादेव मंदिरात भाविकांची मांदियाळी

पहिला श्रावण सोमवार असल्याने अहमदनगरच्या श्री क्षेत्र डोंगरगण येथील रामेश्वर महादेव मंदिरात भाविकांची मांदियाळी पाहायला मिळाली. महादेवाला जलाभिषेक घालून पूजा करण्यात आली. दरवर्षीप्रमाणे यंदाही जिल्हाभरातून भाविक डोंगरगणला येथे दर्शनासाठी येत आहेत. प्रभू श्रीराम वनवासात असताना त्यांनी या परिसरात वास्तव्य केलं असल्याने या मंदिराला रामेश्वर म्हणून संबोधले जाते. मंदिराच्या बाजूलाच प्रभू श्रीरामांनी बाण मारून सीता मातेसाठी एक स्नानगृह निर्माण केल्याची आख्यायिका आहे. तिथे देखील भाविक दर्शनासाठी येत असतात.

 

01/08/2022 10:36:18

सातारा : श्रावणी सोमवारमुळे शिखर शिंगणापूरला भाविकांची मोठी गर्दी

श्रावण मासातील पहिला श्रावणी सोमवार आहे.त्यामुळे शिखर शिंगणापूरला भाविकांची मोठी गर्दी होत असते. आज देखील पहिल्या श्रावणी सोमवार निमित्ताने भाविकांनी मोठी गर्दी केली आहे. कोरोनाच्या पार्श्वभूमीवर गेली 2 वर्ष भाविक महादेवाच्या दर्शनासाठी मुकले होते. परंतु यंदाच्या वर्षी कोरोनाचा प्रादुर्भाव कमी झाला आणि मंदिरे उघडली आहेत. पहिलाच श्रावणी सोमवार असल्याने महादेवाच्या मंदीराला आकर्षक अशी सजावट करण्यात आली आहे. भाविकांची देखील मोठी रेलचेल आहे.

01/08/2022 10:34:45

हिंगोली : हर हर महादेवच्या गजरात नागनाथ मंदिरात भक्तांची मांदियाळी

आठवे ज्योतिर्लिंग असलेले औंढा नागनाथ येथील नागेश दारूकावणे तीर्थक्षेत्र या ठिकाणी श्रावण सोमवारी मोठ्या प्रमाणामध्ये नागनाथ भक्त दर्शनासाठी येत असतात. परंतु गेले काही दिवस कोरोना निर्बंध काळामध्ये भक्तांना नागनाथाचे दर्शन घेणे शक्य नव्हतं. यावर्षी पहिल्याच श्रावण सोमवारी मोठ्या प्रमाणामध्ये नागनाथाच्या दर्शनासाठी भक्तांची गर्दी झाली आहे.  

मध्यरात्री प्रशासकीय पूजा झाल्यानंतर मंदिराचे दरवाजे भक्तांच्या दर्शनासाठी खुले करण्यात आले होते. मध्यरात्रीपासून भक्तांनी दर्शनासाठी लांबच लांब रांगा लावल्या आहेत.

01/08/2022 10:33:20

श्रावणी सोमवार निमित्त भिमाशंकरमध्ये शिवलिंगाची पूजा

आज पहिला श्रावणी सोमवार असल्याने पुणे जिल्ह्यातील भीमाशंकर  मंदिराला आकर्षक सजावट केली गेली आहे. 1200 हून अधिक वर्ष जुन्या असलेल्या भीमाशंकर मंदिराला सुंदर फुलांची आरास केलेली पाहायला मिळतेय. तसेच भक्तिमय वातावरणात अवघा परिसर नाहून गेला आहे. श्रावणी सोमवार असल्याने आज इथे महाअभिषेक आणि महाआरतीचे देखील नियोजन करण्यात आले. 

01/08/2022 10:22:58

उज्जैन महाकालेश्वर मंदिरात गर्दी, शंकराला दुग्धाभिषेक

मध्य प्रदेश : श्रावण महिन्याच्या पहिल्या सोमवारी मध्यप्रदेशातील शिवमंदिरांमध्ये भाविकांची गर्दी असते. सकाळपासूनच भाविकांची वर्दळ असते. उज्जैनच्या महाकालेश्वर मंदिरातही सोमवारी विशेष पूजा करण्यात आली आहे.

01/08/2022 10:02:50

श्रावण महिन्यातील पहिल्या सोमवारी त्रंबकेश्वर गजबजलं, भाविक मोठ्या संख्येने दाखल

01/08/2022 09:58:26

पहिला श्रावणी सोमवार! त्र्यंबकेश्वरमध्ये भाविकांची गर्दी

श्रावण महिना सुरू झाल्यानंतर श्रावणी सोमवारचे वेध लागतात. मागील दोन वर्षे बंद असलेल्या ब्रम्हगिरी प्रदक्षिणेसह त्र्यंबकेश्वर ज्योतिर्लिंगाचे दर्शन घेण्यासाठी भाविकांची गर्दी आहे. त्र्यंबकेश्वर प्रशासनांसह जिल्हा प्रशासनाने विशेष तयारी केली आहे. देशातील बारा ज्योतिर्लिंगांपैकी एक असलेल्या त्र्यंबकेश्वर येथे देशभरातून भाविक येत असतात. त्याच प्रकारे या ठिकाणी श्रावण महिन्यात देखील मोठ्या प्रमाणात भाविकांची गर्दी होत असते. हीच गर्दी लक्षात घेऊन जिल्हा प्रशासनाने नियोजन केलेले  प्रांताधिकारी यांनी नियमावली बनवली आहे. यासाठी। भाविकांच्या वाहन पार्किंगसाठी सहा ठिकाणी वाहनतळ उभारण्यात आले आहेत. जेणेकरून शहरात गर्दी होणार नाही. आज पहिला सोमवार असून 20 हजाराहून अधिक भाविक येण्याची शक्यता प्रशासनाकडून वर्तविण्यात आली आहे. 

सविस्तर बातमीसाठी येथे क्लिक करा.