बाईंना अजूनही त्यांचं काम माहिती नाही? सगळंच प्रदेशाध्यक्षांना विचारुन सांगणार का? रोहिणी खडसेंचा चाकणकरांना टोला

राष्ट्रवादी काँग्रेस पार्टी शरदचंद्र पवार पक्षाच्या महिला प्रदेशाध्यक्षा रोहिणी खडसे (Rohini Khadse ) यांनी डान्सबारच्या मुद्यावरुन महिला आयोगाच्या अध्यक्षा रुपाली चाकणकर यांच्यावर टीका केली.

Rohini Khadse on  Rupali Chakankar :  राज्य महिला आयोगाच्या अध्यक्षा रुपाली चाकणकरांनी ( Rupali Chakankar)  शिवसेना शिंदे गटाच्या मंत्र्यावर डान्सबारबाबत केलेल्या आरोपांवर बोलणे टाळले, यावरुन राष्ट्रवादी काँग्रेस पार्टी शरदचंद्र पवार पक्षाच्या महिला प्रदेशाध्यक्षा रोहिणी खडसे (Rohini Khadse ) यांनी त्यांच्यावर टीका केली आहे. बाईंना अजूनही त्यांचं काम माहिती नाही ? सगळंच प्रदेशाध्यक्षांना विचारुन सांगणार का? असा सवाल रोहिणी खडसेंनी रुपाली चाकणकरांना केला आहे.

उखाणा घ्यायला सांगितल्या सारखं काय नकार देता ? 

सोशल मीडिया प्लॅटफॉर्मवरुन प्रतिक्रिया देताना रोहिणी खडसे म्हणाल्या की, महिला आयोगाच्या अध्यक्षांना अजूनही त्यांचं काम माहिती नाही. राज्यातील बार डान्स, बारबाला, सरकारमधील मंत्र्यांचा त्यात असलेला संबंध यावर पत्रकार प्रश्न विचारत आहेत, जो महिलांशी संबंधित आहे. महिला आयोगाशी संबंधित आहे. पत्रकारांनी उखाणा घ्यायला सांगितल्या सारखं काय नकार देता ? असा टोलाही रोहिणी खडसेंनी रुपाली चाकणकरांना लगावला. 

मागच्या आठवड्यात एका सर्व्हेनुसार 2024-25  या कालावधीत 18 वर्षांखालील बेपत्ता मुलींची संख्या 4 हजार 96 आहे आणि 18 वर्षांवरील महिलांची संख्या 33 हजार 599 इतकी आहे. तुमचं महिला आयोग यावर काय पावलं उचलत आहे ? तुम्ही याबाबत काही धोरण तयार केले आहे का ? की सगळंच तुमच्या प्रदेशाध्यक्षांना विचारून सांगाल ? असा चिमटाही रोहिणी खडसे यांनी रुपाली चाकणकर यांना काढला आहे.

नेमकं प्रकरण काय?

विधिमंडळाच्या पावसाळी अधिवेशनाचा (Monsoon Session 2025) काल शेवटचा दिवस होता. काल सभागृहात बोलताना शिवसेना ठाकरे गटाचे आमदार अनिल परब (Anil Parab) यांनी गृहराज्यमंत्री योगेश कदम (Yogesh Kadam) यांच्यावर गंभीर आरोप केला आहे. गृहराज्यमंत्री योगेश कदम यांच्या आई ज्योती कदम (Jyoti Kadam) यांच्या नावे कांदिवलीतील सावली डान्सबार असल्याचा आरोप त्यांनी केलाय. पोलिसांनी या बारवर धाड टाकून 22 बारबाला ताब्यात घेतल्याचे देखील त्यांनी म्हटले आहे. "डान्सबारवर बंदी असतानाही हा बार कसा सुरू आहे?" असा सवाल देखील अनिल परब यांनी उपस्थित केलाय. अंतिम आठवडा प्रस्तावावर अनिल परब यांनी विधानसभेत हा आरोप केला. अनिल परब म्हणाले की, कांदिवली येथे सावली बार आहे. इथे पोलिसांनी धाड टाकली,त्यावेळी 22 बारबाला पकडल्या गेल्या. 22 बारबाला 22 कस्टमर आणि 4 कर्मचाऱ्यांना पकडण्यात आले. या ठिकाणी कस्टमरवर गुन्हा दाखल झाला. या ठिकाणी पोलिसांनी पंचनामा केला. त्या बारचे परमिट हे ज्योती रामदास कदम यांच्या नावे आहे. त्या गृह मंत्र्यांच्या मातोश्री आहेत, असे त्यांनी म्हटले. 

महत्वाच्या बातम्या: