बुलढाणा : GBS चा वाढता धोका पाहता राज्यातील यात्रांवर निर्बंध आणले जाऊ शकतात. लवकरच अधिकारी आणि प्रशासनाची बैठक घेऊन यावर निर्णय घेणार असल्याची मोठी घोषणा केंद्रीय आरोग्य राज्यमंत्री प्रतापराव जाधव यांची केली. जर हा आजार संसर्गजन्य असल्याचं समोर आलं तर त्यावर कडक उपाययोजना केल्या जातील असंही त्यांनी स्पष्ट केलं.
राज्यातील यात्रांवर निर्बंध आणणार?
केंद्रीय आरोग्य राज्यमंत्री प्रतापराव जाधव म्हणाले की, "GBS हा आजार जर गर्दीमुळे होत असल्याचं किंवा संसर्गजन्य असल्याची माहिती मिळाली तर वैद्यकीय अधिकारी आणि प्रशासनाची बैठक घेऊन लवकरच राज्यातील यात्रांवर निर्बंध आणण्यात येईल. तसेच बुलढाणा जिल्ह्यातील सर्वात मोठी असलेल्या सैलानी यात्रेवरही निर्बंध आणण्याबाबत विचार सुरू आहे."
रविकांत तुपकरांना प्रत्युत्तर
बुलढाण्यातील केस गळती प्रकरणातील अहवाल प्रतापराव जाधव का दडवत आहेत? असा प्रश्न रविकांत तुपकरांनी केला होता. प्रतापराव जाधव नशिबाने राज्यमंत्री झाले, त्यांचा जनतेला काही फायदा नाही असा टोलाही त्यांनी लगावला होता.
रविकांत तुपकरांनी केलेल्या आरोपांवर बोलताना प्रतापराव जाधव म्हणाले की, "कुणाच्याही आरोपांवर मी उत्तर देत बसणे योग्य नाही. मात्र जिल्ह्यातील मतदारांनी मला मत दिलं आहे. मी त्यांच्याशी बांधिल आहे. मी ज्या खात्याचा मंत्री आहे त्या खात्यात मी जिल्ह्यात भरपूर काम करत आहे आणि हे आरोप करणाऱ्यांनी बघावं."
Guillain Barre Syndrome : काय आहे गुइलेन-बॅरे सिंड्रोम?
गुइलेन-बॅरे सिंड्रोम हा एक दुर्मीळ स्वयंप्रतिकार (Auto immune) स्वरुपाचा विकार आहे, ज्यात शरीराची रोगप्रतिकारशक्ती स्वतःच्याच चेतासंस्थांवर (peripheralnervous system) हल्ला करते. यामुळे स्नायू कमजोर होतात आणि गंभीर रुग्णामध्ये पक्षाघातही होऊ शकतो. गुइलेन-बॅरे सिंड्रोम (GBS) हा संसर्गजन्यरोग नाही. तो एका व्यक्तीकडून दुसऱ्या व्यक्तीमध्ये पसरत नाही. या आजाराचे निश्चित कारण अज्ञात आहे. हा आजार एखाद्या श्वसन किंवा पचनसंस्थेच्या संसर्गानंतर होतो. त्यावर तातडीने उपचार करणे आवश्यक आहे. गुइलेन-बॅरे सिंड्रोम हा रोग नवीन नसून, तो अनेक वर्षांपासून ओळखला जातो. हा संसर्गजन्य रोग नसला, तरी काही वेळा जीवाणू किंवा विषाणूच्या संसर्गानंतर तो विकसित होऊ शकतो. तसेच GBS ची इतर अनेक कारणे असतात गुइलेन-बॅरे सिंड्रोम हा रोग वर्षभर आढळतो. साधारणपणे १ लाख लोकांमध्ये एकजण या रोगाने ग्रस्त असतो. त्यामुळे, मुंबईतील मोठी रूग्णालये / वैद्यकीय महाविद्यालयांमध्ये दर महिन्याला 'जीबीएस' चे काही रुग्ण उपचारासाठी येतात.
गुइलेन-बॅरे सिंड्रोमची लक्षणे :
- अचानक पायातील किंवा हातात येणारा अशक्तपणा / दुर्बलता / लकवा- अचानकपणे उद्भवलेला चालण्यातील त्रास किंवा अशक्तपणा- जास्त दिवसांचा अतिसार (डायरिया) आणि ताप
नागरिकांनी घ्यावयाची काळजी
- पिण्याचे पाणी उकळून प्यावे- स्वच्छ व ताजे अन्न खावे- शिजलेले अन्न आणि न शिजलेले कच्चे अन्न एकत्रित ठेऊ नये - वैयक्तिक स्वच्छतेवर भर द्यावा- हात किंवा पायांमध्ये अचानक वाढत जाणारा अशक्तपणा असल्यास त्वरित जवळच्या महानगरपालिका रुग्णालयातील डॉक्टरांशी संपर्क साधावा.
ही बातमी वाचा: