सांगली : सांगलीतील राष्ट्रवादीचे नेते आणि माजी पंचायत समिती सभापती मनोहर पाटील यांची हत्या करण्यात आली आहे. कवठेमहांकाळ तालुक्यातील देशिंग येथे अज्ञात हल्लेखोरांनी त्यांच्यावर धारदार शस्त्रांनी हल्ला करत त्यांची हत्या केली आहे. पूर्ववैमनस्यातून ही हत्या झाल्याचा प्राथमिक अंदाज व्यक्त वर्तवण्यात येत आहे. मात्र या घटनेमुळे जिल्ह्यात खळबळ उडाली आहे.
मनोहर पाटील बुधवारी संध्याकाळच्या सुमारास कवठेमहांकाळ तालुक्यातील देशिंग येथील बोरगाव रस्त्यावर काही जणांसोबत बोलत उभे होते. त्यावेळी अचानक काही अज्ञातांनी येऊन मनोहर पाटील यांच्यावर धारधार शस्त्रांनी हल्ला चढवला. अचानक घडलेल्या हल्ल्यामुळे पाटील यांना स्वत:चा बचाव करण्याची संधीही मिळाली नाही. पाटील यांना गंभीर जखमी करुन हल्लोखोर पसार झाले. दरम्यान तेथे उपस्थित असणाऱ्या ग्रामस्थांनी मनोहर पाटील यांना तातडीने मिरज येथील मिशन रुग्णालयात दाखल केलं. मात्र उपचारादरम्यान त्यांचा मृत्यू झाला.
या घटनेनंतर गावात तणावाचं वातावरण असून तेथे पोलीस बंदोबस्त तैनात करण्यात आला आहे. हत्येप्रकरणी कवठेमहांकाळ पोलीस स्टेशनमध्ये गुन्हा दाखल झाला आहे. पूर्ववैमनस्यातून ही हत्या झाल्याचा प्राथमिक अंदाज व्यक्त करण्यात येत असून पोलिसांनी अधिक तपास सुरू केला आहे.
कोण आहेत मनोहर पाटील
मनोहर पाटील हे कवठेमहांकाळ तालुक्यातील हरोली गावचे रहिवाशी होते. या गावचे ते उपसरपंच राहिले होते. 2017 मध्ये पंचायत समिती सदस्यपदाची निवडणूक त्यांनी लढवली आणि ते विजयी देखील झाले होते. कवठेमहांकाळ पंचायत समिती सभापती पदही त्यांनी भूषवलं होतं. सध्या मनोहर पाटील हे कवठेमहांकाळ येथील महाकाली साखर कारखान्याचे संचालक होते.
चार दिवसांपूर्वी राष्ट्रवादीच्या आनंदराव पाटलांची हत्या
चार दिवसांपूर्वी पलूस तालुक्यातील राष्ट्रवादी काँग्रेस नेते आनंदराव पाटील यांची हत्या झाली होती. आनंदराव पाटील यांच्या डोक्यात वार करून हल्लोखोर पसार झाले होते. राजकीय वादातून हा हल्ला झाल्याचा अंदाज पोलिसांनी वर्तवला आहे. या हल्ल्यात पाटील गंभीर जखमी झाले होते. त्यानंतर उपचारादरम्यान त्यांचा मृत्यू झाला. आनंदराव पाटील हे राज्याचे उपमुख्यमंत्री अजितदादा पवार यांचे स्वीय सचिव गजानन पाटील यांचे बंधू होते.