Mahayuti Meeting : स्थानिक स्वराज्य संस्थांच्या निवडणुकांच्या दृष्टीनं सर्वच राजकीय पक्षांनी तयारीला सुरुवात केली आहे. या निवडणुकांच्या पार्श्वभूमीवर बैठकांचं सत्र सुरु आहे. दरम्यान, आज महायुतीच्या समन्वय समितीची बैठक सुरु झाली आहे. राज्याप्रमाणे जिल्हास्तरीय समन्वय समिती स्थापन करण्यात येणार आहेत. यामध्ये भाजप, शिवसेना व राष्ट्रवादीसह घटक पक्षांचा समावेश असणार आहे.
जिल्हा स्तरावर 5 नेत्यांची समन्वय समिती स्थापन करण्यात येणार आहे. विधीमंडळ पक्षीय समन्वयासाठी ही समिती नेमण्यात येणार आहे. तालुका व जिल्हा स्तरावरील शासकीय समित्यांचा फॉर्म्युला आज अंतिम होणार आहे. जिल्हा नियोजन समितीच्या निधी वाटपाचे सूत्र देखील ठरणार आहे. विशेष कार्यकारी अधिकारी नियुक्ती 15 दिवसांत नेमण्यावर चर्चा देखील सुरु आहे. 500 मतदारांमागे एक विशेष कार्यकारी अधिकाऱ्यांचा कोटा ठरवण्यात येणार आहे.
राज्यात लवकरच स्थानिक स्वराज्य संस्थांच्या निवडणुका होण्याची शक्यता
राज्यात लवकरच स्थानिक स्वराज्य संस्थांच्या निवडणुका होण्याची शक्यता असून, त्यात महापालिका निवडणूक विशेष लक्षवेधी ठरणार आहे. आगामी काही महिन्यांत या निवडणुकीची घोषणा होण्याची शक्यता वर्तवली जात आहे. त्यामुळे महत्त्वाच्या महानगरपालिकेवर कोणाचा झेंडा फडकेल? महापौर कोणत्या पक्षाचा असेल? याबाबत सर्वसामान्यांपासून राजकीय वर्तुळात मोठी उत्सुकता निर्माण झाली आहे. राज्यातील सध्याची राजकीय परिस्थिती, गटबाजी, युती-बिघाडी पाहता मुंबई महापालिकेची निवडणूक अत्यंत प्रतिष्ठेची लढत ठरणार आहे. शिवसेना (ठाकरे गट), शिवसेना (शिंदे गट), भाजप, काँग्रेस, राष्ट्रवादी काँग्रेस (शरद पवार गट), राष्ट्रवादी काँग्रेस (अजित पवार गट) यांच्यात या निवडणुकीसाठी जोरदार रणधुमाळी होण्याची चिन्हे आहेत. या पार्श्वभूमीवर प्रत्येक पक्षात मोठ्या प्रमाणावर बैठका, रणनीती ठरवण्याचे प्रयत्न सुरू झाले आहेत. इच्छुक उमेदवारांनीही आपले प्रचारकार्य सुरू केल्याचे चित्र अनेक प्रभागांत दिसत आहे.
मुख्यमंत्री देवेंद्र फडणवीस हे आगामी काळात विभागवार बैठका घेण्याची शक्यता
राज्याचे मुख्यमंत्री देवेंद्र फडणवीस हे आगामी काळात विभागवार बैठका घेण्याची शक्यता आहे. काल (सोमवारी, ता14) रात्री उशीरा मरावाड्यातील आमदारांची वर्षावर बैठक पार पडली आहे, यामध्ये स्थानिक स्वराज्य संस्थांच्या निवडणुकीत भाजप वरचढ ठरला पाहिजे अशा प्रकारची भूमिका ही मुख्यमंत्र्यांकडून देण्यात आल्याची माहिती आहे. त्याचबरोबर मुख्यमंत्र्याकडून आमदारांना काही सूचना देखील देण्यात आल्या आहेत. मतदारसंघातील महत्त्वाची कामे, स्थानिक समित्यांचे वाटप असेल हे आधिकार देखील आमदारांना देण्यात आले आहेत त्याचबरोबर महापालिका जिंकण्यासाठी आमदारांना पूर्ण ताकद मी स्वतः देणार असल्याचं मुख्यमंत्र्यांनी बैठकीत म्हटलं आहे.
महत्वाच्या बातम्या:
Devendra Fadnavis: पालिका निवडणुकीसाठी वर्षा बंगल्यावर गुप्त खलबतं, देवेंद्र फडणवीस निवडक आमदारांना म्हणाले, 'मी तुम्हाला पूर्ण ताकद देतो...'