नांदेड : नांदेडमध्ये एका एसटी कंडक्टरने बसमध्ये आत्महत्या केल्याची धक्कादायक घटना समोर आली आहे. संजय जानकर असं या कंडक्टरचं नाव असून एसटीमधील घंटा वाजवण्याच्या दोरीनेच त्यांनी गळफास घेऊन जीवन संपवलं. संजय जानकर यांनी लिहिलेली चार पानांची सुसाईड नोटही सापडली आहे.
54 वर्षीय संजय जानकर यांनी आज पहाटे आत्महत्या केली. जानकर यांनी चार पानांची सुसाईड नोट लिहून गळफास घेतला. संजय जानकर हे नांदेडमधील माहूर आगारात कार्यरत होते. त्यांच्याजवळील तिकीटामध्ये मोठी तफावत आढळली होती. त्यामुळे कामावरुन आपल्याला काढलं जाईल या भीतीने त्यांनी हे टोकाचं पाऊल उचलल्याचं कळतं.
संजय जानकर यांनी आपल्या सुसाईड नोटमध्ये परिवहन मंडळाला जबाबदार धरलं आहे. तिकीट काढण्याचे मशीन सतत बिघडतं. त्यामुळे तिकीटांमध्ये तफावत आढळून आली आहे. काही चूक नसताना निलंबन होऊन समाजात बदनामी होईल या भीतीपोटी त्यांनी आत्महत्या केली.
एसटी महामंडळमधील नवीन तिकीट मशीन नादुरुस्त आणि बिघडलेल्या आहेत. यामुळे वाहकांना नाहक त्रास होऊन बडतर्फ केलं जात असल्याचा आरोप संजय जानकर यांनी सुसाईड नोटमध्ये केला आहे.