Maharashtra Breaking News LIVE Updates : दिवसभरातील महत्त्वाच्या बातम्यांचा आढावा एका क्लिकवर..

14/01/2022 20:05:45

इयत्ता पाचवी आणि इयत्ता आठवीची शिष्यवृत्ती परीक्षा पुढे ढकलण्याचा निर्णय

इयत्ता पाचवी आणि इयत्ता आठवीची शिष्यवृत्ती परीक्षा पुढे ढकलण्याचा निर्णय महाराष्ट्र राज्य शिक्षण परिषदेने घेतलाय. ही परीक्षा 20 फेब्रुवारीला होणार होती. त्याचबरोबर या परीक्षांसाठी ऑनलाईन अर्ज आणि परिक्षा फी भरण्यासाठी आता 31 जानेवारीपर्यंत शाळांना मुदतवाढ देण्यात आली आहे. ही परीक्षा 20 फेब्रुवारीला होणार होती

14/01/2022 19:02:31

अभिनेते किरण माने यांना मालिकेतून काढणे म्हणजे मोगलशाही पेक्षा वाईट आणि राज्य माने यांना सरकारने न्याय दयावा... सचिन खरात

एखाद्या पक्षाला बहुमताने सत्ता मिळते म्हणजे त्या पक्षाला हम करेसो कायदा करण्याचा आणि लोकशाहीच्या चिंधड्या करण्याचा दिलेला नाही. म्हणून मराठी अभिनेते किरण माने यांना मालिकेतुन काढून टाकले हे कृत्य मोगलशाही पेक्षाही वाईट आहेत या कृत्याचा रिपब्लिकन पार्टी ऑफ इंडिया (खरात) पक्ष निषेध करत असून महाराष्ट्र सरकारने याची त्वरित दखल घेऊन या प्रकरणाची चौकशी करावी आणि किरण माने यांना न्याय दयावा.

14/01/2022 18:17:34

ज्येष्ठ शिवसेना नेते सुधीर जोशी यांना कोरोनाचा संसर्ग

ज्येष्ठ शिवसेना नेते सुधीर जोशी यांना कोरोनाची बाधा झाली असून त्यांच्यावर मुंबईतल्या जसलोक रुग्णालयात उपचार सुरू आहेत. सुधीर जोशी शिवसेनाप्रमुख बाळासाहेब ठाकरे यांचे अत्यंत जवळचे सहकारी आहे. शिवसेना पक्ष संघटनेत सुधीर जोशी यांची महत्वाची भूमिका आहे.

14/01/2022 17:56:25

शिवाजीनगर ते स्वारगेट भुयारी मार्गांपैकी एका बाजूच्या टनेलचे काम पूर्ण

पुणे मेट्रोच्या पीसीएमसी ते स्वारगेट या मार्गिकेमध्ये शिवाजीनगर ते स्वारगेट हा मार्ग भुयारी आहे. या मार्गिकेची लांबी ६ किमी असून त्यामध्ये शिवाजीनगर, सिव्हिल कोर्ट, बुधवार पेठ, मंडई, स्वारगेट हि पाच भूमिगत स्थानके आहेत. कृषी महाविद्यालय ते स्वारगेट या भुयारी मार्गाची लांबी ६ किमी असुन जाण्यासाठी व येण्यासाठी असे दोन टनेल बांधण्यात येत आहे. या दोन टनेल पैकी एका बाजूचे टनेल खोदण्याचे काम आज पुर्ण झाले आहे. एकुण १२ किमी टनेल पैकी १०.८ किमी (९० % ) टनेलचे काम पुर्ण झाले आहे. आज दि. १४.०१.२०२२ रोजी स्वारगेट वरून निघालेले पवना नावाचे टनेल बोरींग मशीन बुधवार पेठ येथील भूमिगत स्थानकात पोहोचले आणि ब्रेक थ्रू साधला गेला आहे. स्वारगेट मधून निघालेले चवथे टनेल बोरिंग मशीन मंडई स्थानकाजवळ असुन लवकरच ते उर्वरीत १.२ किमीचा बोगदा पुर्ण करून बुधवार पेठ स्थानकाजवळ मार्च २०२२ अखेरीस पोहोचेल.

14/01/2022 17:55:14

ज्या ज्या मार्गाने इंपेरिकल डाटा गोळा होईल त्या मार्गाने गोळा करायचा आहे - छगन भुजबळ

ज्या ज्या मार्गाने इंपेरिकल डाटा गोळा होईल त्या मार्गाने गोळा करायचा आहे. आपण जो अध्यादेश काढला त्याचा बेस काय आहे, हे न्यायालय पटवून देत आहोत. 17 जानेवारी ला सुनावणी होणार आहे. महाराष्ट्र सदन प्रकरणात अजनीं दमानिया पुन्हा कोर्टात गेल्या त्यावर काही भाष्य नाही. कोणाला काय करायचे करू द्या, आम्ही बोलणार नाही, असे छगन भुजबळ म्हणाले

14/01/2022 17:54:19

जेष्ठ शिवसेना नेते सुधीर जोशी यांची प्रकृती अत्यावस्थ

जेष्ठ शिवसेना नेते सुधीर जोशी यांची प्रकृती अत्यावस्थ. सुधीर जोशी यांना कोविड १९ संसर्गाची बाधा झाली असून त्यांच्यावर मुंबईतल्या जसलोक हाँस्पिटलमध्ये उपचार सुरू आहेत. सुधीर जोशी शिवसेनाप्रमुख बाळासाहेब ठाकरे यांचे अत्यंत जवळचे सहकारी. शिवसेना पक्ष संघटनेत सुधीर जोशी यांची महत्वाची भूमीका आहे.

14/01/2022 16:28:32

चहाडे तांदुळवाडी रोडवर वसरोली येथे कार आणि दुचाकीचा भीषण अपघात, एकाचा मृत्यू

पालघर : चहाडे तांदुळवाडी रोडवर वसरोली येथे कार आणि दुचाकीचा भीषण अपघात झाला. यामध्ये एकाचा जागीच मृत्यू तर तीन जण गंभीर जखमी झाले आहे. जखमींना मासवन येथील शासकीय रुग्णालयात दाखल केलं आहे.

14/01/2022 13:44:36

राजकीय दबावातून वाहिनीनं आपल्याला मालिकेतून बाहेरचा रस्ता दाखवला, अभिनेते किरण माने यांचा घणाघाती आरोप

स्टार प्रवाह वाहिनीवरील 'मुलगी झाली हो' या मलिकेतून नुकतीच गच्छंती झालेले अभिनेते किरण माने यांनी घणाघाती आरोप केलाय. राजकीय दबावातून वाहिनीनं आपल्याला मालिकेतून बाहेरचा रस्ता दाखवला असा दावाच किरण माने यांनी केलाय. इतकच नव्हे तर मालिके्तून हटवण्यासाठी स्टार प्रवाहच्या पेजवर एक कॅम्पेन राबवली गेली होती असंही किरण माने यांचं म्हणणं आहे. किरण माने त्यांच्या सोशल मीडिया अकाउंटवर अनेक पोस्टमधून राजकीय भूमिका मांडत असतात. त्यांच्या अशाच काही पोस्टवरून ते ट्रोल झाले होते आणि समाजमाध्यमात तीव्र प्रतिक्रिया उमटल्या होत्या. किरण माने यांना मालिकेतून बाहेरचा रस्ता दाखवल्यानंतर आता राजकीय विश्वातूनही प्रतिक्रीया उमटू लागल्या आहेत त्यामुळे हा विषय आता राजकीय वळणावर जाऊन पोहोचलाय.

14/01/2022 13:42:37

महत्त्वाच्या बैठकीला उपस्थित राहू शकत नसाल तर तब्येत बरी होईपर्यंत चार्ज दुसऱ्याकडे द्या : चंद्रकांत पाटील

मुख्यमंत्री उद्धव ठाकरे पंतप्रधानांबरोबरच्या बैठकीला अनुपस्थित राहिल्यानं भाजपचे प्रदेशाध्यक्ष चंद्रकांत पाटील यांनी टोला लगावला. महत्त्वाच्या बैठकीला उपस्थित राहू शकत नसाल तर तब्येत बरी होईपर्यंत चार्ज दुसऱ्याकडे द्या, अशी मागणी त्यांनी पुन्हा एकदा केली.

14/01/2022 13:42:02

काम न करता बोलणारे अनेक आहेत : मुख्यमंत्री

मुख्यमंत्री उद्धव ठाकरे यांनी आज विरोधकांना टोला लगावलाय. काम न करता बोलणारे अनेक आहेत, अशा शब्दांत त्यांनी विरोधकांना फटकारलं. लोक कौतुक करत नसले तरी कोविड काळात केलेल्या कामाचं न्यूयॉर्कपासून ते न्यायालयापर्यंत अनेकांनी कौतुक केलं, असं मुख्यमंत्री यावेळी म्हणाले. मुंबई महापालिकेच्या व्हॉट्स चॅट बॉट सुविधेच्या लोकार्पण कार्यक्रमात ते बोलत होते.

14/01/2022 13:38:39

नांदेडच्या मुखेडमध्ये गारपीट; मुखेड, देगलूर तालुक्यात काही ठिकाणी हलक्या स्वरूपाच्या सरी

गेले चार दिवसांपासून ढगाळ वातावरण असलेल्या नांदेडच्या मुखेडमध्ये काल गारपीट झालेय. तर, मुखेड, देगलूर तालुक्यातील काही ठिकाणी हलक्या स्वरूपाच्या सरीदेखील बरसल्या. अवकाळी पावसामुळे रब्बी पिकांसह फळबागांचं मोठं नुकसान होण्याची शक्यता आहे.

14/01/2022 13:37:31

राज्यात थंडीचा कडाका आणखी दोन दिवस कायम राहणार

राज्यात थंडीचा कडाका आणखी दोन दिवस कायम राहणार असल्याचा अंदाज हवामान खात्यानं वर्तवलाय. गेल्या तीन-चार दिवसांपासून राज्याला चांगलीच हुडहुडी भरली आहे. दोन दिवसांनंतर उत्तरेकडील थंडीची लाट ओसरायला सुरुवात होणार आहे. त्यामुळे महाराष्ट्रातही तापमान 2-3 अंशांनी वाढण्याचा अंदाज आहे.

14/01/2022 12:17:27

नांदेड येथे कोचिंग क्लासेसकडून कोरोना नियमांचे उल्लंघन, चार कोचिंग क्लासेसना महापालिकेकडून दंड

वाढती कोरोना रुग्ण संख्या लक्षात घेऊन जिल्हाभरातील 1 ली ते 8वी च्या शाळा व कोचिंग क्लासेस बंद ठेवण्याचे आदेश नांदेड जिल्हाधिकारी डॉ. विपीन इटनकर यांनी काढले आहेत. त्यानुसार जिल्हाभरातील शाळा खासगी शिकवणी वर्ग अथवा कोचिंग क्लासेस बंद करण्यात आले.परंतु जिल्हा प्रशासनाच्या या आदेशाची पायमल्ली करत व कोरोना नियमांना तिलांजली देत नांदेड शहरातील काही कोचिंग क्लासेस राजरोसपणे चालत होते. त्यामुळे कोरोना नियमावलीचे उल्लंघन केल्याप्रकरणी नांदेड वाघाळा शहर महापालिकेच्या पथकाकडून नांदेड शहरातील चार कोचिंग क्लासेसला तब्बल 95 हजार रुपयांचा दंड ठोठावण्यात आलाय.

नांदेड शहरात कोरोणाचा बुधवारी उद्रेक झाला होता. दरम्यान एकाच दिवशी 474 रुग्ण आढळले. त्यामुळे प्रशासकीय यंत्रणा हादरून गेलीय, कोरोनाची तिसरी लाट वेगाने पसरेल असा अंदाज वैद्यकीय तज्ञांनी वर्तवला आहे. नांदेडमध्ये बुधवारी एकाच दिवशी 474 रुग्ण आढळले आहेत. महापालिकेने 12 जानेवारीपासून शहरात कोरोना नियमावलीच्या अंमलबजावणीसाठी तेरा पथके कार्यान्वित केले आहेत. या पथकाने गुरुवारी शहरातील कोचिंग क्लासेसला भेटी दिल्या. यावेळी कोचिंग क्लासेस मध्ये मोठ्या संख्येने विद्यार्थी आढळले. अनेक विद्यार्थ्यांना मास्कही नव्हता. त्यामुळे महापालिकेच्या या पथकाने कोचिंग क्लासेसच्या संचालकांना दंड ठोठावला आहे.यामध्ये सर्वाधिक दंड (पन्नास हजार रुपये) आरसीसी क्लासेस ला ठोठावण्यात आला आहे. तर शांभवी क्लासेस ला 25 हजार, दरक कोचिंग क्लासेसला १० हजार रुपये आणि सलगरे कोचिंग क्लासेसला दहा हजार रुपये दंड ठोठावला आहे. महापालिकेच्या आरोग्य विभागाचे प्रमुख उपायुक्त अजितपालसिंघ संधू यांच्या नेतृत्वाखालील महापालिका पथकाने ही कारवाई केली आहे यापुढेही शहरात अशीच कारवाई सुरू राहील असे उपायुक्त संधु यांनी सांगितले.

14/01/2022 09:14:30

डॉ बाबासाहेब आंबेडकर विदयापीठ नामविस्तार दिन, गीत रामायण क्रार्यक्रमातून आठवणी

14/01/2022 07:24:45

आजसाठी भारतीय तेल कंपन्यांकडून पेट्रोल-डिझेलचे दर जारी

देशातील महानगरांतील आजचे दर :

देशातील प्रमुख शहरं	पेट्रोलची किंमत प्रति लिटर	डिझेलची किंमत प्रति लिटर
मुंबई	109.98	94.14
दिल्ली	95.41	86.67
चेन्नई	101.40	91.43
कोलकाता	104.67	89.79
पाटणा	105.92	91.09

14/01/2022 07:24:21

गो एअरलाइन्सकडून आयपीओवर बंदी

14/01/2022 07:22:05

18 दिवस गायब असलेले भाजप आमदार नितेश राणे अखेर माध्यमांसमोर

गेले 18 दिवस गायब असलेले भाजप आमदार नितेश राणे काल माध्यमांसमोर आले. सिंधुदुर्ग जिल्हा बँकेत नितेश राणे दाखल झाले. सिंधुदुर्ग जिल्हा बँकेत भाजपच्या मनीष दळवी यांची अध्यक्ष म्हणून काल निवड झाली. राणे यांनी नव्या अध्यक्षांचं अभिनंदन केलं. शिवसेनेच्या संतोष परब हल्ल्याप्रकरणी नितेश राणे यांनी अटकपूर्व जामिनासाठी कोर्टात अर्ज केला होता. त्यानंतर नितेश राणे गायब झाले होते. आणि काल 18 दिवसानंतर ते समोर आले.

14/01/2022 07:21:16

संक्रांतीच्या दिवशी राज्यातील मंदिरं बंद

संक्रांतीच्या दिवशी आळंदीतील संत ज्ञानेश्वर महाराजांचं मंदिर आणि देहूतील संत तुकाराम महाराजांचं मंदिर बंद राहणार आहे. पुणे आणि आसपासच्या परिसरात कोरोनाचे रुग्ण वाढले आहेत. त्यातच संक्रांतीच्या दिवशी मंदिरांमध्ये भाविकांची गर्दी होण्याची शक्यता आहे. त्यामुळे दोन्हीही मंदिरं बंद ठेवण्याचा निर्णय घेण्यात आलाय. तर, तिकडे पंढरपुरातील विठोबाचं मंदिर मात्र, 15 जानेवारीपर्यंत सुरुच राहणार आहे. कोरोनाचे नियम पाळून भाविकांना विठ्ठलाचं दर्शन घेता येणार आहे.

14/01/2022 07:20:35

देशातली सध्याची कोरोना परिस्थिती पाहता देशात लॉकडाऊन नाही, पंतप्रधानांचे संकेत

देशातली सध्याची कोरोना परिस्थिती पाहता देशात लॉकडाऊन लागणार नसल्याचे संकेत पंतप्रधान मोदींनी काल दिले. अर्थव्यवस्थेची गाडी रुळावर आणायची असेल तर उद्योगधंद्यांना कमीत कमीत नुकसान होण्यासाठी प्रयत्न करावे लागतील असं मोदी म्हणालेत. कोरोनाला आळा घालायचा असेल तर स्थानिक पातळीवर कंटेन्मेंट झोन तयार करण्याची आवश्यकता असल्याचंही मोदी म्हणाले. देशभरातील 30 राज्यांच्या मुख्यमंत्र्यांशी पंतप्रधान मोदींनी काल संवाद साधला. या बैठकीला राज्याचे मुख्यमंत्री उद्धव ठाकरे प्रकृतीच्या कारणास्तव अनुपस्थित होते. मुख्यमंत्र्यांऐवजी आरोग्यमंत्री राजेश टोपे आणि गृहमंत्री दिलीप वळसे पाटील यांनी या बैठकीला उपस्थिती लावली.

14/01/2022 07:19:46

दिवसभरातील महत्त्वाच्या बातम्यांचा आढावा घेण्यासाठी एबीपी माझा लाईव्ह पाहा

Maharashtra Breaking News LIVE Updates : इयत्ता पाचवी आणि आठवीची शिष्यवृत्ती परीक्षा पुढे ढकलण्याचा निर्णय

पार्श्वभूमी