Kolhapur District Gram Panchayat Election : कोल्हापूर जिल्ह्यातील 475 ग्रामपंचायतींच्या निवडणुकांची रणधुमाळी आजपासून सुरु होणार आहे. जिल्ह्यातील 12 तालुक्यांमधील मुदत संपलेल्या गावांमध्ये निवडणुका होत असून  तहसीलदारांकडून आज निवडणूक नोटीस प्रसिद्ध केली जाणार आहे. त्यानंतर संबंधित गावांना आचारसंहिता लागू होईल. ग्रामपंचायतींच्या निवडणुकांमुळे गावागावांतील वातावरण तापले आहे. जिल्ह्यातील ग्रामपंचायतींसाठी 28 नोव्हेंबर ते 2 डिसेंबर दरम्यान अर्ज दाखल केले जातील. 5 डिसेंबरला अर्ज छाननी होईल., 7 डिसेंबरला चिन्ह वाटप व उमेदवारांची अंतिम यादी जाहीर होईल. 18 डिसेंबरला मतदान व 20 डिंसेबरला मतमोजणी होणार आहे.


ग्रामपंचायत निवडणूक स्थानिक पातळीवर गटतट करून लढवली जात असली, तरी आगामी विधानसभा पेरणी सुद्धा याच माध्यमातून होणार आहे. थेट सरपंच निवडणूक असल्याने तगडा उमेदवार शोधण्याचेही आव्हान आहे. काँग्रे, राष्ट्रवादी, भाजपसह शिवसेना उद्धव ठाकरे गट, शिंदे गटही निवडणुकीच्या रिंगणात असेल. त्‍यामुळे गावांमध्ये चांगलाच संघर्ष रंगण्याची चिन्हे आहेत.


कोल्हापूर जिल्ह्यातील 446 सदस्य निवडणुकीसाठी अपात्र


ग्रामपंचायत सार्वत्रिक निवडणूक 2017 मध्ये कोल्हापूर जिल्ह्यातील ज्या उमेदवारांनी निवडणूक खर्चाचा हिशोब मुदतीत सादर न केलेल्या 446 सदस्यांना अपात्र ठरवण्यात आले आहे. त्यामुळे निवडणूक आयोगाच्या आदेशान्वये पाच वर्षांच्या कालावधीकरीता पंचायत सदस्य म्हणून राहण्यास किंवा सदस्य होण्यासाठी निवडणूक लढविण्यास अपात्र असतील. अशा उमेदवारांची यादी kolhapur.gov.in या संकेतस्थळावर उपलब्ध करण्यात आली आहे, अशी माहिती महसूल विभागाचे उपजिल्हाधिकारी श्रावण क्षीरसागर यांनी दिली आहे.


महाराष्ट्र ग्रामपंचायत अधिनियम 1958 कलम 14 (ब) (1) अन्वये ग्रामपंचायत सार्वत्रिक निवडणूक 2017 मध्ये जिल्ह्यातील हातकणंगले, राधानगरी, कागल, भुदरगड, शाहूवाडी, गडहिंग्लज, पन्हाळा व करवीर तालुक्यातील एकूण 446 उमेदवारांनी निवडणूक खर्चाचा हिशोब मुदतीत सादर न केल्याने त्यांना जिल्हाधिकाऱ्यांच्या आदेशान्वये अपात्र ठरविण्यात आले आहे. कोल्हापूर जिल्ह्यातील ऑक्टोबर ते डिसेंबरअखेर मुदत संपणाऱ्या 475 ग्रामपंचायतींच्या निवडणुकीसाठी मतदारयादी जाहीर करण्यात आली आहे. 31 मे 2022 पर्यंत अस्‍तित्‍वात असलेली मतदार यादी गृहित धरण्यात आली आहे. 


कोल्हापूर जिल्ह्यातील 12 तालुक्यातील ग्रामपंचायती खालीलप्रमाणे आहेत 



  • करवीर 53

  • कागल 26

  • पन्हाळा 50

  • शाहूवाडी 49

  • हातकणंगले 39

  • शिरोळ 17

  • राधानगरी 66

  • गगनबावडा 21

  • गडहिंग्लज 34

  • आजरा 36

  • भुदरगड 44

  • चंदगड 40


इतर महत्वाच्या बातम्या