औरंगाबाद : आयसिसच्या संपर्कात असल्याच्या संशयावरुन अटक झालेल्या परभणीच्या नासेरबिन चाऊसनं बॉम्ब बनवण्याची तयारी पूर्ण केल्याची माहिती आहे. एटीएसने औरंगाबाद कोर्टात याबाबत माहिती दिली आहे.   नांदेड, औरंगाबाद, हैदराबाद हे नासेरबिन चाऊसचं टार्गेट असल्याचीही माहिती आहे. त्या बॉम्बचे छायाचित्र सिरीयातला दहशतवादी फारुकला पाठवण्यात आलं होते. चाऊसला हा बॉम्ब बनवण्यासाठी हवाला मार्फत पैसे मिळाले होते.   परभणीतील गाडीवान मोहल्ल्यातून नासिरबिन अबूबकर याफई उर्फ चाऊस या 21 वर्षीय तरुणाला अटक करण्यात आली होती. गेल्या आठवड्यात अचानक या मुस्लीमबहुल वस्तीत एटीएसचं पथक दाखल झालं आणि त्यांनी नासेरबिनला अटक केली.   कोण आहे नासेरबिन? नासेरबिन हा दहशतवादी संघटना आयसिसच्या संपर्कात होता असा एटीएसचा आरोप आहे. रमजानच्या महिन्यात त्यानं मोठा घातपात घडवण्याचा कट आखला होता, अशी माहिती एटीएसच्या सुत्रांनी दिली आहे. नासेरबिनवर लावेलेले सर्व आरोप त्याच्या कुटुंबियानं फेटाळले आहेत.    

VIDEO: पाहा नासिरबिनच्या भावाची एक्स्क्लुझिव्ह मुलाखत

  पॉलिटेक्निकचा विद्यार्थी असलेला नासिर बेन काही महिन्यांपूर्वी औरंगाबादच्या वैजापूरमधून परभणीत परतला होता.त्यांच्या कुटुंबियांची परभणीत शेती आहे. तसंच त्यांचा हॉटेलचाही व्यवसाय आहे.मात्र आयसिसच्या संपर्कात असल्याच्या आरोपावरून, नासिरला अटक झाल्यामुळं सगळ्यांनाच धक्काच बसला आहे.   एमआयएमचं अटकेविरोधात आंदोलन नासिरबिनच्या अटकेविरोधात एमआयएमने परभणीत धरणं आंदोलन सुरु केलं. दहशतवादी कारवायांबाबत मराठवाड्याचा इतिहास चिंताजनक आहे. सिमी आणि इंडियन मुजाहिद्दीनसारख्या संघटनेनं बीड, लातूर, औरंगाबाद आणि परभणीमध्ये चांगलंच नेटवर्क तयार केलं होतं. आता मराठवाड्यावर आयसिसची वक्रदृष्टी पडलीय. इथल्या मुस्लिम तरूणांना आकर्षित करण्यासाठी आयसिसचे जोरदार प्रयत्न सुरू आहेत. आयसिसचा हा डाव उधळून लावण्याचं मोठं आव्हान तपास यंत्रणांसमोर उभं ठाकलं आहे.